Relashoná ku e desishon di gobièrnu pa kòrta den e presupuesto di e asosiashon di piskadó Piskabon, Din Domacasse di partido MPB ta bisa lo siguiente: ‘Ta parse ku sierto hendenan ke insinuá ku kosnan den Piskabon ta totalmente fo’i sla pa hustifiká kòrtamentu den e sèn ku Piskabon ta risibí for di gobièrnu. Nos ta kere den importansia di transparensia, pa henter komunidat di Boneiru por mira kiko ta pasando.
Nos ta insistí riba diálogo, transparensia i koperashon pa por logra un solushon awó, pero tambe pa riba término largu pa nos komunidat i pa nos piskadónan.
Segun Din Domacasse, ta bon pa realisá ku no ta sr Delanoy so ta Piskabon.
Piskabon ta un organisashon ku tin un direktiva i mas di 50 miembro. Piskabon tin un kompania di akountent ku ta traha pa nan, pa atendé i mehorá e parti finansiero.
Pues Piskabon ta hasiendo esfuerso pa organisá nan asuntunan finansiero.
Gobièrnu mester yuda nan den esei i no kibra nan.
Nos ta konsehá gobièrnu pa pone un spil dilanti di nan kara pa realisá ku finansa di gobièrnu a tuma dekadanan pa yega na un kuenta anual aprobá aña pasá numa. Awor den shete luna di gobernashon e gobièrnu aki a krea un kaos den departamentu di finansa ku te hasta Hulanda a desaprobá kambio di presupuesto di e gobiernu aki ku ta un boftá den kara di Boneiru. Kon e gobernantenan akí lo sinti nan mes si kòrta den presupuesto di gobièrnu?’, asina Domacasse ta puntra.
E logronan di Piskabon; Mas aleu Domacasse ta trese dilanti ku Piskabon a realisá hopi proyekto bon den e ultimo añanan pa piskadónan, por ehèmpel esun di FADS ku ta nifiká hopi pa piskadonan por gana mas entrada kada dia. Domacasse: ‘Piskabon ta bishitá vários konferensia i ta organisá aktividat pa siña i trese mehorashon riba tereno di peskeria i ta pasa e konosementu aki pa nos piskadónan.
Mi mes sa di hopi kaso di piskadó ku a risibí yudansa di Piskabon pa kumpra boto, motor etc. Mi ta desapuntá ku nèt awó ku tin un organisashon di piskadó ku ta basta aktivo e gobièrnu aki ta hasi kos arogante i deskabeyá, purbando na kibra Piskabon.’
.png)
Comments