MPB/ UPB tabata hasi mal maneho finansiero ku nos Isla, ku nan boka yen di palabra bunita di supuesto bon gobernashon. Na 2022 eks Diputado Hennyson Thielman a kompromete Gobiernu di Boneiru pa mas ku 6 mion doler, fuera di tur lei i regla sin ku esaki ta presupuesta. Pa Kuenta Anual di 2023 a resulta mesun kos.
Thielman a krea un defisit di mas ku 3 mion doler, sen ku a gasta dimas, sin ta presupuesta. Na 2024 e storia lo a kontinua riba mesun rumbo, si ehekuta e presupuesto manera prepara pa Hennyson Thielman, Gobiernu ta kore risiko di bai bankarota.
Diputado Abraham ta hasi masha bon, mester ruim op de boel i drecha nos maneho finansiero. No a manda nan kas i kambia Gobiernu pa nos kontinua riba e mesun ruta di mal maneho. Nos ta Goberna pa Pueblo, no pa kompinchi!
Ta manera ayera, yuli 2023 den reunion di Konseho Insular tratando Kuenta Anual 2022, Kolega Abraham ta alerta ku tin mas ku $6 mion ku a wordu kompremete sin ku esaki ta presupuesta. Algu ku ta un gastu ilegitimo, kontra di nos leinan.
Riba konseho di e tempu ei kolega konsehal Abraham, tur lider di Frakshon den Konseho Insular konhunto, Dirksz, Coffie, Abraham i mi persona a tuma kontakto ku e accountant pa verifika lokual a wordu konstata. E accountant a verifika esaki i a komproba ku e gastunan hasi ta ilegitimo, i por sierto Kolegio Ehektivo mester pidi Konseho Insular pa absolve nan transgreshon por medio di un desishon di idemnidat, kual Kolegio Ehekutivo a hasi konfirmando nan transgreshon.
Den mi motivashon di voto, mi a bisa bon kla ku ta ultimo biaha ku mi ta tolera e tipo di kosnan aki. Pa años, di buena fe, mi a kere tur motibo i ekskusa ku nan tabata presenta pa nan mal maneho. Semper e tabata algu diferente ku a aparenta of falta di otro, den realidat tur a resulta mentira.
E kos mas penoso ta, ku Thielman no kier a responsabilsa su maneho na Konseho Insular pero kier a laga su kolega hoben i nobato Sra. Jolinda Craane bai inosentemente karga e vra na su luga. Siendo alerto, Diputado Craane a anunsia su ausensia pa motibu di salu, obligando Thielman mes bin reponsabilisa su maneho.
Tratando kuenta annual 2023 na yuni ultimo aki, a resulta meskos. Bou di maneho finansiero di Thielman, a gasta 3 mion doler mas ku lokual tabata tin presupuesta. Sen di pueblo tira afo, pa sasia kompinchi politiko. Awor pa lei, hefe di finansas por aproba solamente gastu ku ta den un presupuesto stipula pa Raad i aproba pa Minister.
Bo ta kere ku e hefe di finansas ku tabata tei na 2023, ku ta komplis’e i a permiti esaki sosode fuera di lei, por keda labora den e aparato?
Ademas a bini aserka for di boka di hefe di accountant i hefe di finansas nobo, ku si ehekuta e presupuesto 2024 manera prepara pa Thielman, na fin di 2024 Gobiernu ta kore risiko di bai bankarota. Bo ta kere ku por sigui ku un maneho asina ‘ki?
Nos mester a sigui riba mesun ruta pa Gobiernu bati bankarota na fin di 2024?
Mi ta gradesi dios pa a ilumina mi mente pa kita sosten for di Gobiernu di MPB/UPB. Danki dios a manda nan kas. Danki dios, ku entre otro mi sosten, Clark Abraham tei komo diputado yuda ruim op de boel. Clark Abraham ta Goberna pa sirbi pueblo di Boneiru, i pa e motibu ei i hopi mas, na mi opinion e si ta sirbi pa Goberna!
.png)
Comments