Segun Alfred Burgos di M21; Inhustisia di Parti E Sistema di Impuesto na Hulanda Karibense

Alfred Burgos di partido polítiko M21 ta un suidadano preokupá.

E motibu pa esaki sr Burgos ta deskribí komo lo siguiente:

‘En prinsipio e sistema di impuesto mester ta un sistema hustu i bon organisá, ku suidadanonan mester por konfia riba dje. Sinembargo mi eksperensia resien ku servisio di impuesto di Hulanda Karibense a afektá mi konfiansa den e instansia akí seriamente.

Indiferensia atministrativo i but; Alfred Burgos ta splika mas aleu ku den korespondensia ku servisio di impuesto nan a bis’é lo siguiente: ‘Sin bo komprobante di pago nos no por buska bo pago i buk esaki riba bo anslag ku ta habrí.’ Segun sr Burgos esaki ta impliká ku e pagadónan di impuesto tin ku entregá prueba, di manera ku servisio di impuesto por hasi su trabou. ‘Ta apsolutamente inakseptabel ku un instansia ku ta risibí miónes di sèn di impuesto, ta asina indiferente i desorganisá ku nan no por verifiká pago den un

forma independiente, sin ku un suidadano tin ku entregá prueba pa esaki.’

Un peso dòbel pa suidadano; ‘Ya ta hopi fastioso kaba ku mi tin ku proba ku mi a paga e impuesto di vehíkulo di motor. Pa kaba koroná obra, dia 19 di yüni mi a risibí un rekordatorio pa ‘grondbelasting’ di aña 2023, ku tambe mi a paga kaba.

E rekordatorio akí ta fechá 11 di yüni 2024, i mi a hasi e pago asina lat, pa motibu ku mi a hasi opheshon kontra altura di e impuesto. Despues ku servisio di impuesto a aprobá mi opheshon, mi a paga e suma ahustá mas ku un siman promé ku e fecha ei’, segun Burgos.

Keho i retraso; Afred Burgos a entregá un keho serka e Defensor di Pueblo Nashonal (Nationale Ombudsman), Reinier van Zutphen. Tokante esaki e ta bisa:

‘Entretantu mi ta wardando riba un kontesta di e Defensor di Pueblo. Te na e momentu ei mi ta verwagt ku servisio di impuesto mes ta buska mi pagonan.

Ta inakseptabel ku servisio di impuesto ta traha di e sistema akí i den un forma inhustu ta imponé kobransa i but riba suidadanonan.’

Yamada pa akshon; Segun Alfred Burgos e artíkulo akí kaminda e ta duna su opinion, ta un yamada na tur hende ku a yega di konfrontá problemanan similar: ‘Nos tin ku uni nos bosnan i eksigí ku servisio di impuesto ta bai traha na un manera mas efisiente, mas transparente i mas hustu. Pa medio di traha huntu nos por pone un fin na e inhustisia akí. A bira tempu pa servisio di impuesto asumí su responsabilidat i stòp di imponé but i kobransa, sin averiguá promé si debidamente a hasi e pago kaba. Laga nos lucha huntu pa un sistema di impuesto mas hustu!’