Ku gran plaser hunta di supervishon di Water – en Energiebedrijf Bonaire (WEB) ta anunsiá e nombramentu di Raymond (Roy) Silberie komo e direktor general (CEO) nobo di WEB Bonaire N.V.
Señor Silberie, ku a nasé i krese na Boneiru, a optené su grado di Ingenieria Eléktriko di Universidat di Antianan Hulandes na aña 1995. Despues di kompletá su edukashon, e la kuminsá su karera na WEB Bonaire N.V., kaminda e la okupá vários posishon di liderazgo tantu na nivel operashonal komo na nivel di maneho.
Na ougùstùs 2020, e la laborá na ContourGlobal (CGB), e produktor di energia na Boneiru, komo hefe di operashon (COO) pa CGB Bonaire i Antianan Franses. Na yanüari 2022, el a regresá na WEB Bonaire N.V. komo Internal Business Advisor, un funshon den kua e tabata konsehá e team di maneho i direktiva, i tabata responsabel pa estudionan stratégiko i plannan di utilidat.
Ku kasi 30 aña di eksperensia, señor Silberie ta trese un konosementu profundo di e strategia di WEB i metanan pa un desaroyo sostenibel di energia i awa pa futuro. Den tempu bon i tempu difísil, e la hasi un kontribushon signifikante na e éksito di WEB Bonaire N.V. i tin konosementu i eksperensia amplio den sektor di utilidat, spesialmente di elektrisidat, awa di bebe i tratamentu di awa di kloaka.
Silberie ta konosí no solamente ku nos kultura di kompania, pero tambe ku e nesesidatnan i oportunidatnan úniko den nos komunidat. Hunta di supervishon i gerensia di WEB Bonaire N.V ta kontentu di yama bon biní na señor Raymond Silberie komo direktor general (CEO) di WEB entrante 1 di yüli 2024.
Hunta di supervishon i gerensia ta kere ku e nombramentu di sr. Silberie, WEB lo tin un CEO hopi eksperto i un persona ku por trese hende huntu. E nombramentu aki ta nifiká ku e team di Direktor Statutario di tres persona di WEB Bonaire N.V ta kompletu. Hunta di supervishon ta felisitá WEB ku e nombramentu aki i ta deseá sr. Silberie tur klase di éksito den su funshon nobo.
E Hunta di supervishon di WEB Bonaire N.V. ke ekspresá nan gratitut na sra. Balentien-Nicastia (CFO) i sr. Scharrenberg (COO) pa nan ròl adishonal komo CEO interino i nan esfuerso eksepshonal pa manehá e organisashon durante un periodo desafiante, kaminda e kresementu i desaroyonan riba e isla ta trese hopi reto.
Huntu ku tur kolega i interesadonan nan, nos lo drenta e fase nobo aki ku hopi kurashi i yama bon biní na sr. Silberie den su funshon nobo.
.png)
Comments