Jan 5, 20233 min read

RELATO ANUAL 2022 – FRAKSHON COFFIE

Di parti di Daisy Coffie, lider di Frakshon Coffie den Konseho Insular di Boneiru, ta bai e mihó deseonan pa aña 2023 pa tur habitante di Boneiru. E aña akí atrobe Frakshon Coffie ta presentá su relato anual. Daisy Coffie: ‘Komo miembro di Konseho Insular di Boneiru mi ta un representante di pueblo i komo tal mi ta representá tur habitante di nos isla. Esaki ta nifiká ku mi tin ku konosé nos komunidat ‘door en door’ i ku, mas importante ainda, mi mester ta dispuesto pa hasi esaki ku máksimo dedikashon. Esaki ta nifiká tambe ku kontinuamente mi mester ta den kontakto ku pueblo, pa mi sa kiko ta biba serka nos hendenan. Di e manera akí, na momentu di tuma desishon, den un forma adekuá mi por pone interes di nos habitantenan den balansa. Komo miembro di Konseho Insular mi ta haña mi enbolbí ku hopi asuntu práktiko na nos isla, manera tráfiko, kaminda, bibienda, medio ambiente, kuido di salú, kuido di hende grandi, kultura, deporte etc. Den e relato akí bou mi ta bai ilustrá kuantu biaha durante aña 2022 mi a partisipá aktivamente den reunionnan di Konseho Insular, pero tambe di komishonnan fiho. Promé ku kada reunion mi mester a lesa dokumentu, hasi investigashon i papia ku hopi hende tokante tópiko di e reunion. Naturalmente mi ta duna tambe un bista general di tur e otro trabounan ku Frakshon Coffie a hasi durante e aña tras di lomba.’

Trabou atministrativo i preparashon pa reunion

Trabou atministrativo ta algu di tur dia. Ta trata di korespondensia, fail dokumentu ‘hard copy’ i digital, manehá konvokashon pa reunion, prepará dokumentu pa reunion i atendé ku telefòn i agènda. Diariamente tambe mester studia dokumentunan ku a drenta i hasi preparashon pa reunionnan ku ta den tapara. Esaki ta enserá prepará pregunta pa den reunion i pregunta por eskrito i tambe vários disertashon. Un tarea importante ta e parti di studia asuntunan ku ta biba den komunidat i eventualmente hasi pregunta tokante esakinan den reunion. Durante aña 2022 esaki tabata regardá reunion ku sekretario di estado A. van Huffelen, parlamentario di Union Oropeo Samira Raphaela i minister di Asuntonan Sosial Carola Schouten. Aparte di esakinan por menshoná tambe reunion tokante Kadernota Maneho di tereno (2x), kambio di presupuesto 2022 (3x), tratamentu di presupuesto 2023, Selibon, reorganisashon di aparato gubernamental, oumento di kosto di bida spesífikamente energia (WEB), mínimo sosial, impuesto di turista i impuesto riba awa shushi. No ménos ku 91 biaha konsehal Daisy Coffie a atendé ku siudadanonan ku tabatin mester di asesoramentu i a duna nan e yudansa te kaminda tabata por.

Pregunta por eskrito.

Durante aña 2022 8 biaha konsehal Daisy Coffie di Frakshon Coffie a manda karta ku pregunta por eskrito. E tópikonan tabata: deklarashon di diputado Kroon tokante BOPEC, tereno di Cargill, Territorial Authorized Officer - TAO OLB, oumento di preis, stadion di Playa, Bonlab, nos botikanan i e rotònde Kaya Amsterdam – Kaminda Djabou.

Reunion i bishita di trabou

Ta opvio ku reunion ta un parti esensial di trabou di un miembro di Konseho Insular. Representando su pueblo konsehal Daisy Coffie a partisipá na e siguiente reunionnan durante aña 2022: presidio (11x), komishon fiho (26x), reunion di forma opinion (12x), reunion di tuma desishon (10x), reunion sosial ku gruponan informal (12x), otro reunionnan (36x), CFT (2x), komishon fiho di Tweede Kamer pa relashonnan den Reino (2x), Eerste Kamer (2x), sr Barnard di ministerio di Salubridat Públiko, Bienestar di Deporte (1x), sekretario di estado van Huffelen (1x), sekretario di estado van Rij (1x), minister Carola Schouten (1x), Grupo di trabou revishon di WolBES, FinBES (3x), parlamentario di Union Oropeo Samira Raphaela (2x) i vários otro polítiko na Den Haag (17x). Na Hulanda tambe Daisy Coffie a hasi vários bishita di trabou entre otro kongreso di VNG E instansianan i organisashonnan kaminda konsehal Daisy Coffie a hiba bishita di trabou ta: Kongreso di ALIDE na Kòrsou, Krusada, Cargill, Hardin Botániko, Kunukeronan, Selibon, WEB, Kas Flamboyan, Indebon, Dia di Saba i BonLab.

Publisidat

Konsehal Daisy Coffie ta kere den transparensia i durante aña 2022 a tene komunidat bon informá. Esaki pa medio di komunikado di prensa den vários idioma (20x), entrevista na medionan di prensa (37x) i karta ku prensa ta publiká (6x). Riba medionan sosial tambe konsehal Daisy Coffie tabata hopi aktivo aña pasá ku no ménos ku 156 publikashon.

Relato finansiero

Pa por ehersé e trabounan akí Frakshon Coffie a risibí un kompensashon pa frakshon. Den e tabèl akí bou por mira e responsabilisashon di e kompensashon akí. E parti mayor ta bai na trabounan di kantoor di frakshon. Ku ta trabou nesesario pa Consehal Coffie por eherse su trabou komo konsehal mas efektivo posibel.