Dentro di poko gobièrnu di Boneiru ta bai kuminsá tambe vários trabou mantenshon i rekonstrukshon di kaya.
Reparashon partinan di kaminda di asfalt; Tin sierto parti di Kaminda di Rincon ku tin mester di mantenshon èkstra. Den e periodo binidero ta bai drecha sierto partinan pa medio di kita e fundeshi, pone rant nobo di betòn. Ta bini klenku riba e parti kantu di kaminda, i e kaminda mes ta haña un kapa nobo di asfalt.
Rekonstrukshon i asfaltamentu di kaminda; Ta bai kuminsá tambe ku trabounan públiko grandi. Ta trata akí di e siguiente kamindanan spesífiko:
Tanki Matrimonio; Ta kuminsá ku trabou den bario Tanki Matrimonio. Akí e énfasis ta riba fundeshi i pasada di awa. Seguidamente ta pone klenku den e kayanan.
Kaya Tre i besindario; Ta bai atendé ku pasada di awa. Seguidamentu ta pone klenku den e kayanan. Ta trata akí di spesífikamente Kaya Tre, Kaya Drùm i Kaya Bongo.
Konektá Kaya Apelsina i Kaya Papaya ku Kaya M. Pourier; Ta bai atendé ku e problemátika di pasa di awa. Tambe ta bai pone klenku den e kayanan akí, inkluso asera.
Kaya Proud; Den Kaya Proud tambe ta bai atendé ku pasada di awa. Seguidamente restrukturashon di e kaya, pa hasi e kaya akí mas habitabel.
Mantenshon di kaminda di asfalt; Tambe lo bai hasi mantenshon na e kamindanan di asfalt, pa medio di sera buraku kaminda esaki ta posibel. A tene kuenta ku e impakto ku esaki lo tin riba tráfiko, i e mantenshon lo tuma lugá na momentunan stratégiko, di manera ku e inkumbiniensia pa usuarionan di e kamindanan ta keda minimalisá.
Den e simannan i lunanan binidero, ku regularidat lo publiká e aktualisashonnan nesesario relashoná ku e áreanan di trabou riba medionan sosial, bou di e nòmber ‘R&O den akshon’.
.png)
Comments