Mar 10, 20233 min read

Reakshon Di Willem Cecilia Tokante Impuesto Pa Turista

Despues ku un miembro di konseho insular a hasi algun pregunta krítiko pa loke ta trata kobransa di e impuesto turístiko, entidat públiko di Bonaire huntu ku e kuerpo polisial di Caribe Hulandes a laga sa ku den e kaso aki no tin kuestion di un hecho kastigabel. Ta parse ku tin algun rebendedó ku na ningun manera no ta afiliá na e entidat públiko di Boneiru i tampoko na e ofisina di turismo di Boneiru (TCB), ta duna servisio di kobra e belasting menshoná, ta traspasá e montante legal di 75 dòler pa persona i ta sobra 30 dòler pa nan mes. Esaki ta pone ku e turista sin mester i sin nòdi, ta paga mas pa e impuesto.

Por ta bon bon ku no tin kuestion di un hecho kastigabel pero e preguntanan di e miembro di konseho insular ta dirigí tambe riba e parti di e derecho atministrativo i si ta deseabel pa laga un situashon asina sigui èksistí. Despues di e preguntanan di e miembro di konseho insular, den purá entidat públiko di Boneiru a saka un komunikado, tresiendo dilanti ku mester ta alerta i ta solamente un wèpsait original tin pa kobra e impuesto di turista, i esaki ta ‘tourismtax.bonairegov.com’.

E preguntanan di e miembro di konseho insular, te asina leu ku mi sa, no a keda kontestá ainda dor di gezaghèber, ku ta na dje dirigí, pero na e reakshon di e entidat públiko di Boneiru por konkluí ku nan no ta sinti nan mas muchu komfortabel ku e situashon i no sa muchu bon kiku esaktemente pa hasi.

Den un desishon konteniendo medidanan general di dia 22 di ougüstüs 2022, no. 5 pa loke ta trata implementashon di e ordenansa pa impuesto di turismo Bonaire 2022, tin pará ku ora hasi aplikashon pa paga e impuesto, e siguiente informashonnan mester keda duná: fam i nòmber di e turista, e pais unda ta biba, number di sédula, fecha di nasementu i un deklarashon si e persona ta un studiante si ta aplikabel, i por último un imeil kaminda lo manda e komprobante ku a paga e impuesto.

Den e aklarashon di e desishon aki ta splika ku a sòru pa pidi lo minimal posibel na informashon personal ora ta ehekutá e ordenansa. E dato lo wòrdu supliká riba un página sigurá di e entidat públiko di Boneiru pa medio di un formulario ku ta disponibel ‘on line’. E datonan pidí ta asesibel solamente dor di personanan outorisá di e sekshon di Finansas di entidat públiko di Boneiru.

Subiendo riba e wèpsait ofishal enbèrdat ta pidi e informashon menshoná ku eksepshon di e nr. di sédula, Mas aleu ta pidi tambe e fecha di yegada i salida, kuantu dia lo keda riba e isla, kua kompania di aviashon a usa, e meta di e bishita i si ta keda na un hòtel òf apartamentu, Un detaye ta ku loke ta pidi riba e wèpsait ofishal na ta kuadra kompletamente ku e wèpsait di e rebendedó.

Konsekuensia ta ku por papia di un deskrepansia. Ta generá un asina yamá kódigo QR pero kiku eksáktamente e kontroladó na èrpòrt por mira ora e skèn e kódigo? E informashon optené dor di e rebendedó tambe ta generá un kódigo úniko pero ken tin akseso na e informashon aki i nan wèpsait ta bon protehá konforme normanan di Caribe Hulandes i Oropa?

Dor di pone den e nota di aklarashon di e desishon ku e dato ta wòrdu pidí pa medio di un página sigurá di e entidat públiko di Boneiru pa medio di un formulario ‘on line’, i tambe ku solamente personanan outorisá por wak e dato, e entidat públiko eksplisítamente ta duna di konosé ku defakto nan ta e úniko instansia ku por kobra e impuesto aki. Hasta e entidat públiko a duna di konosé ku ta solamente un wèpsait original tin pa kobra e impuesto di turista, i esaki ta ‘tourismtax.bonairegov.com’.

Pues e derecho di kobra e impuesto di turismo ta pertenesé ekslusivamente na e entidat públiko di Boneiru i traspaso di e derecho spesífiko aki solamente ta posibel si esaki a keda reglá den e ordenansa mes òf e desishon di implementashon. Kokluyendo mester bisa ku debidamente por papia di un insidente politiko, atministrativo i hurídiko, si un tersero ta kobra e impuesto sin ku esaki ta reglá hurídikamente.

dr. Willem A. Cecilia