Despues di algun luna di preparashon, Qredits ta klá pa lansa un programa di edukashon nobo yamá ‘Introduction to Entrepreneurship’ (Orientashon Empresarial). E programa aki lo fungi komo un trayekto preliminar pa personanan sin konosementu previo di emprendementu i ku lo ke partisipá na ‘Small Business Academy’ of kualke otro programa mas avansá. Ministerio di Asuntunan Ekonomiko i Klima di Hulanda den su afan pa aportá na entre otro e desaroyo ekonómiko di Boneiru, Saba i Statia a subsidiá parti di e gastunan hasí pa por a krea e programa nobo aki.
Qredits Boneiru for di aña 2021 a ekspandé e programa di ‘Small Business Academy’ ku kuater siman di lès durante kual e kursistanan ta haña informashon basiko di emprendementu. Esaki ku e meta pa 1) nan ta konsiente kiko emprendementu ta kome i bebe, 2) kiko emprendementu ta eksihí di nan i kon pa prepará, i 3) kon pa skohe un produkto i/òf servisio ku e kursista por trese riba merkado. Komo prueba final, e kursistanan mester a introdusí nan mes komo un futuro empresario i e produkto i/òf servisio ku nan ke trese riba merkado pa medio di un ‘ptch’.
Despues di evaluashon di e panel, kursistanan a tende si nan por a sigui ku e parti ofisial di ‘Small Business Academy’ òf si nan mester sigui otro trayekto di desaoryo i asta den algun kaso risibí e konseho pa no emprendé.
Mirando e impakto grandi ku e kuater simannan di lès adishonal ariba menshoná a bin ta hasi, Qredits a aserká Ministerio di Asuntunan Ekonomiko i Klima di Hulanda na 2023 ku e proposishon pa krea un programa ofisial, bou di nòmber ‘Introduction to Entreprenuership’. E ministerio den su afan pa kontribuí na e desaroyo empresarial i ekonómiko di entre otro islanan BES, a brasa e proposishon aportando na e gastunan di desoryá e programa. Awe nos por konta ku un programa mas konsistiendo di un ‘E-learning’, un buki di trabou i un seri di lès. Pues un danki inmenso na e Ministerio pa yuda nos realisá esaki.
.png)
Comments