Brussel - Gezaghèber Edison Rijna a dediká su biahe di trabou spesialmente na e proyekto di Galileo pa Boneiru i e konsulta tripartit ku a tuma lugá siman pasá na e siudat akí.
Na Boneiru den e tempu binidero nan ta konstruí un stashon di sensor pa Galileo. Galileo ta e sistema mundial sivil di nabegashon via satélite di Union Oropeo den kolaborashon ku e Organisashon Oropeo di Nabegashon Espasial (ESA). Establesimentu di e stashon akí na Boneiru ta trese posibilidatnan duradero di desaroyo ekonómiko kuné, entre otro pa negoshinan ‘startup’ i empresanan teknológiko. Gezaghèber Rijna a laga e Directorate General for Defense Industry and Space (DG DEFIS) i e Directorate International Partnerships (DG INTPA) dun’é mas informashon tokante e oportunidatnan akí. Banda di esaki el a hasi un bishita na e Space Forum ku a tuma lugá na Brussel durante e siman ei. Den e periodo binidero e Ofisina Internashonal ku resientemente nan a añadí na gabinete di gezaghèber ta papia tokante e oportunidatnan akí konhuntamente ku e stakeholdernan i lo konsehá Kolegio Ehekutivo mas aleu tokante esaki.
Riba djamars gezaghèber a partisipá na e konsulta tripartit entre Komishon Oropeo, e estadonan miembro Hulanda, Fransia i Dinamarka i e paisnan i teritorionan ultramar. E konsulta tripartit akí tabata dediká partikularmente na e preparashonnan pa e konferensia ministerial na fin di luna di novèmber na Nueva Caledonia. Komo ekstenshon di esaki gezaghèber a tene vários kombèrsashon bilateral ku representantenan di e otro islanan.
Riba agènda tabatin tambe un momentu di sera konosí ku e direktor nobo pa Amérika Latino i área karibense di e Directorate International Partnership, Felix Fernandez Shaw. Gezaghèber Rijna a finalisá su programa di trabou na Brussel ku un bishita na e Representashon Permanente di Hulanda na Brussel.
===========================================
BròKèS 93.5 ………… Skuch’é!
https://www.radio935bonaire.com
http://radio.garden/listen/bro-ke-s-93-5-fm-boneiru/a1YG6S77
https://www.basilachill.com/#!radio/radiobrokes
http://brokes935fm.radiostream123.com
https://liveonlineradio.net/radio-brokes-935-Radio
.png)
