Entrante 1 di febrüari 2024, Laurienne Francis ta e Polis di bario di Nikiboko i besindario. Pa e motibu aki tabatin un kampaña pa sera konosí ku e polis di bario nobo.
Komo parti di e kampaña a saka komunikado di prensa i a tene vários entrevista.
Tambe a bishitá diferente skol, akohida pa mucha, instituto, negoshi i tienda kaminda a parti foyeto di informashon, pega poster, saka potrè i kombersá ku habitantenan.
Remarkabel tabata desafionan ku habitantenan ta enfrentá i a trese dilanti na e polis di bario. Esaki ku e meta pa por yuda tuma akshon kaminda i na momentu ku ta nesesario. Entre otro iluminashon den sierto áreanan, ladronisia, mal estado di kaya, molèster di kachó, molèster di awa na momentu di yobida, molèster di zonido i ‘fevermentu’ prosedente di motosaikel i outo, outo i trùknan ku ta kore ku velosidat haltu den áreanan habitá i molèster di trùknan ku ta transportá karga, ta kai bou di desafionan aki.
Bunita tambe tabata reakshonnan di habitantenan, entre otro ku awor nan ta sinti nan mas seif ku presensia di polis di bario i tambe sa kon i na ki momentu pa tuma kontakto.
Ku polis di bario, Kuerpo Polisial Hulanda Karibense kier duna abo komo habitante di bo bario e sintimentu di siguridat i trankilidat pa biba. E polis di bario ke ta mas serka di bo, ke yuda pensa ku bo i ke ta atento pa kualke situashon ku por surgi.
Habitantenan di Nikiboko i besindario por tuma kontakto ku Laurienne na momentu ku mester di solushonnan struktural pa problemanan ku ta bini frekuentemente dilanti den e bario. Mas presensia di polis den bario ta aportá na un mihó komunidat i un mihó isla.
Pa drenta den kontakto ku bo polis di bario, yama 599 715 8000 durante oranan di ofisina i puntra pa polis di bo bario. Den kaso di emergensia, semper yama 911! Un bon relashon ku polis di bo bario, ta kondusí na un bario seif!
BròKèS 93.5 ………… Skuch’é!
.png)
