For di 2018 Wageningen University & Research i Carmabi ta traha huntu pa trese informashon históriko i informashon resien tokante komposishon di vegetashon i plamamentu di espesie di mata na e seis islanan hulanda karibense huntu. Awor akí opservashon di mata for di e CACTUS-database akí ta disponibel online via wèpsait di DCBD (http://speciesdistribution.dcbd.nl). Den e promé siman di desèmber a lansa e wèpsait na Aruba.
CACTUS-database ta konsistí di mas òf ménos 2500 parsela di vegetashon digitalisá, loke ta resultá den mas òf ménos 40.000 opservashon di espesie di mata. A komplementá esakinan ku mas òf ménos 10.000 registrashon di mata for di potrèt digital, database di siensia kaminda suidadanonan ta hunga un ròl aktivo, GBIF, rapòrt di inventarisashon i registrashon adishonal di vèlt. Pa mas ku 80% di e kantidat total di espesie di mata vaskular indígeno i eksótiko naturalisá ku ta presente riba e seis islanan, awor akí tin algun opservashon disponibel, ku prinsipalmente ta kubri e periodo di 1950 – 2022. Aktualmente ta ehekutando un proyekto di NLBIF ku ta enfoká riba digitalisashon di registrashonnan di herbario históriko adishonal pa tur e seis islanan.
Ta presentá e informashonnan riba un resolushon di roster di 1x1 km riba e wèpsait (figura 1). Informashon geográfiko mas detayá ta disponibel riba petishon, pa metanan sientífiko i di konservashon. E wépsait ta hasi selekshon di opservashon dentro di periodonan di tempu posibel, loke ta hasi análisis di tendensia di patronchi di plamamentu di espesie posibel (figura 2), prinsipalmente den kasonan kaminda disponibilidat di informashon ta komparabel den e periodonan ku a kompará. Análisis di tendensia ta un instrumento esensial pa formulashon di Lista Kòrá di espesie di bestia menasá. Ademas ta posibel pa mira kaminda tin bashí den informashon pa espesienan spesífiko, loke por enkurashá yagdó di mata entusiasmá pa duna informashon nobo di opservashon di e matanan akí.
E kantidat di opservashon ta diferensiá hopi pa kada isla, kaminda un mayoria grandi di opservashon (56%) ta prosedente di Kòrsou, siguí pa Aruba (13%) i Boneiru (11%). Pa Sint Maarten ainda informashon ta relativamente skars. Regularmente ta añadí registrashon nobo, despues di kua ta aktualisá e informashonnan presentá riba wèpsait di DCBD.
potrèt 1: Lansamento di e website (http://speciesdistribution.dcbd.nl) na Fundacion Parke Nacional Aruba
Figura 1. Riba e wèpsait di plamamentu di espesie bo tin ku skohe un isla i e nòmber sientífiko di un espesie di mata. Riba e mapa a ilustrá plamamentu di e kadushi Stenocereus griseus na Aruba, basá riba e informashonnan di opservashon ku ta disponibel. Riba potrèt 2 por mira un shoko (Athene cunicularia arubensis) sintá riba e tipo di kadushi akí (potrèt di John Janssen).
Figura 2. Plamamentu na Saba di e orkidia eksótiko Oeceoclades maculata den periodo di 1990 – 2000 (na man robes: no tin opservashon konosí di promé ku 1990) i despues di aña 2000 (na man drechi). Un oumento di presensia di e espesie akí ta konosí tambe di otro islanan karibense. Riba potrèt 3 e orkidia akí ta floriando (potrèt di Michiel Boeken).
.png)
Comments