Penshonadonan na Boneiru ta un di e gruponan vulnerabel den nos komunidat. Sigur esnan ku penshun di behes ta nan úniko entrada tur fin di luna. I ta tristu pa mira kon hopi di nos penshonadonan ainda tin ku traha despues di 65 aña di edat pa nan por gana algu èkstra pa yuda nan kubri nan gastunan di tur luna, kual nan ta hür di kas, awa i. koriente, transporte públiko, kuminda i artíkulonan di uzo personal, manera produktonan di sanitario, pero tambe de bes en kuando un karson o kamisa, mea, sapatu etc. Antó hopi biaha e trabou èkstra aki ta trabou peligroso i trabou di warda durante oranan di anochi i mardugá. Penshonadonan meresé mihó.
Despues di a duna 30 pa 40 aña di nan bida na komunidat trahando sea pa gobièrnu, sea pa un kompania òf pa nan mes, nan meresé di por hiba e delaster etapa di nan bida den un forma finansieramente trankil sin e preshon di kon tin ku paga gastunan básiko manera mi a deskribí, Den un palabra nan tin derecho riba un eksistensia digno i humano. I e derecho aki ta ankrá den nos konstitushon bou di artíkulo 20 i mi ta sita:
Nederlanders hier te lande, die niet in hun bestaan kunnen voorzien, hebben een bij de wet te regelen recht op bijstand van overheidswege. Si nos tradusí esaki na papiamentu e ta bisa: “Ulandesnan(i nos ta ulandes) aki, ku no por prove’é den nan ekskistensia, tin derechi riba un asistensia reglá den lei”
I for di ora un asuntu ta reglá den lei, e ta bira un derecho i no un fabor. Pues un penshonado e ora ei no ta dependé di ningun fabor polítiko pa e por reklamá su derecho riba e penshun di behes. Asina e po mustra ku ela yega e edat di penshun, e ta ulandes e ta bai ofisina di departamentu di asuntunan sosial i di labor, yena e formularionan ku nan dun’é i fin di e luna siguiente ku ela kumpli e edat di kobra penshun, e ta kuminsá kobra su penshun te dia su Kreador yam’é bin kas bèk.
Despues ku USIBO a organisá e manifestashon popular pasífiko aña pasá, minister a subi e penshun di behes di Usd.752 pa Usd.1047 pa luna entrante 1 di yanüari 2023. Nos ta gradesido pa esei, pero entre tantu gastunan a sigui subi i e problema a keda. Pa eliminá e problema aki mester stipulá un mínimo sosial. Na Ulanda entre tantu diferente moveshon ta tumando lugá pa pone preshon i e gobièrnu ulandes ku despues di 13 aña a yega e momento awor si pa stipulá e mínimo sosial pa nos hendenan na Boneiru, entre kua nos penshonadonan. Eerste Kamer, partidonan den Tweede Kamer, FNV, e sindikato ku mas ku 2 mion miembro, Asosashon di Munisipionan Ulandes, diferente medionan di prensa ta entre esnan ku a uni i ta pone preshon. Na Boneiru tambe USIBO ta kordinando un koalishon pa 12 di mei awor bolbe bin ku un manifestashon popular, e biaha aki un manifestashon di solidaridat ku esnan vulnerabel den nos komunidat, esta esnan ku ta risibí ònderstant, penshun di behes i penshun di biuda, di biuda i di huérfano. Komo penshonado i eks presidente di grupo di 60 plùs Grupo Grasiosoo Uni 60 plus Nikiboko, ami Ewald G Abdul kier a invitá tur mi kompañero i kompañeranan di e otro organisashonnan di 60 plùs den e otro bario nan i tambe tur esnan afiliá den UPAH pa djòin e manifestashon aki, Nos lema lo ta
PENSHONADONAN DI BONEIRU TAMBE TA SOSTENE E LUCHA PA STIPULA UN MINIMO SOSIAL PA UN EKSIUSTENSIA DIGNO I HUMANO.
Ewald G Abdul
Konsehero AFBW.
BròKèS 93.5 ………… Skuch’é!
.png)
Comments