No ta sekreto ku Ramoncito Booi for di 2015 a kritiká tantu UPB komo James Kroon ku nan no ta defendé i saka probecho for di Laso Direkto ku Hulanda. Despues di ocho aña Ramoncito ta abiertamente den kampaña ku atakenan fuerte kontra spesial MPB. Mi ke trata na komprondé e retórika di Ramoncito di e siguiente manera. Despues di UPB su lucha pa Laso Direkto tabata defuntu Jopi Abraham ku a firma e akuerdo ku Hulanda. Sigur esaki a bira un trouma pa Ramomcito. Un otro punto di disgustu ta ku Elvis riba di lista di UPB a bira e kandidato ku mas voto a ninga bira lider di UPB i a lanta MPB na 2013 i haña mas voto na 2015 i 2019. E akuerdo di maneho entre DP i UPB ku segun Ramoncito e ku Jopi tabata e arkitektonan, tambe a frakasá pa motibu di problemanan den UPB i DP ku diferente independiente i diferente koalishon ku entre otro MPB. Ku duele Ramoncito a mira ku UPB, apesar di a kai di kuater asiento te na dos, a sigui forma parti di koalishon pero sin ganashi. Ora a bira definitivo ku Nina “votegetter” di MPB no ta bai elekshon Ramoncito a mira e momentu oportuno pa drenta arena, despues di ocho aña, ku un mensahe fuerte pa votadónan di UPB ku a bai MPB regresá kas. Ramoncito a arma un strategia pa hasi e kampaña un guera entre MPB i UPB i krea e miedu ku un partido progresivo manera MPB,DP i M21 ta bira esun mas grandi i fuerte. Tres punto den e strategia ta; Ramoncito a bira e bosero prinsipal di UPB, silensiá James Komo lider di UPB. Ta tira falta riba MPB ku a bira e kashi di warda horka i ta buska aliado ku un miembro di famia Demokrat pa debilitá DP. E meta ta un maneho di Bonaire sin partisipashon di MPB. Ramoncito ta riba e ruta pa UPB so ta na mando ku sinku asiento òf un koalishon ku Demokrat. No keda strañá ku e posibilidat pa UPB forma ku MPB ta keda eksistí.
Athur Sealy
===========================================
BròKèS 93.5 ………… Skuch’é!
.png)
