Notisia di polis di djaluna 22 di aprel te ku djárason 24 di aprel 2024
Ladronisia di baiskel; Djabièrnè 19 di aprel a drenta keho di ladronisia di un baiskel koló kòrá di e marka Merida. E baiskel no tabata na lòk i tabata stashoná banda di otro baiskelnan, na e fèlt di futbòl Rudy Boezem na Nort’i Saliña. Tabata djasabra 13 di aprel entre 5.30 or di atardi i 10or di anochi, deskonosínan a bai kuné. Ta investigando e kaso.
Kandela den instituto; Djaluna 22 di aprel, alrededor di 5.35 or di atardi, polis a risibí notifikashon tokante kandela den kamber di un instituto na Tanki Matrimonio.
Na yegada di brantwer a konstatá ku un kolchon den e kamber tabata na kandela.
Brantwer tabatin e situashon bou di kòntròl i a paga e kandela.
No tabatin hende den e kamber. E patruya a tuma keho di pegamentu di kandela intenshonal. Ta investigando e kaso.
Detenshon pa menasa; Djamars 23 di aprel, alrededor di 9.20 or di anochi, a detené un hòmber di inisial A.C. riba Kaya Mandolin pa menasa i violashon di Lei di Arma BES.
E sospechoso tabata bou di influensia di alkohòl i a kuminsá buska pleitu ku un dama. Durante e pleitu el a menasa e dama i a tira un bòter di serbes den su direkshon.
E bòter di serbes no a alkansá e dama i seguidamente e sospechoso a bandoná e sitio.
Un patruya a topa e sospechoso den bisendario i a detené.
Durante di e detenshon a topa e sospechoso ku un skrufdrai i un kuchú i a konfiská esakinan. Investigashon den e kaso ta kontinuá.
.png)
留言