Kòntròl di velosidat;
Den oranan di mainta riba djaluna 27 d februari a tene kòntròl di velosidat na Bulevar E.E.G. i na Kaya Ir. R. Statius van Eps. A kontrolá un total di 9 outo i a duna 4 prosèsferbal pa manehá riba e velosidat máksimo permití. A midi e velosidat ku un ‘lasergun’ spesial.
Detenshon pa manehá bou di influensia;
Riba djaluna 27 di februari a detené un hòmber di inisial L.V.C.C. di 63 aña di edat riba Kaya Rincon. Un patruya a spòt e shofùr miéntras e tabata kore meimei di kaminda ku su outo. A par’e i durante e kòntròl por a konkluí ku e tabata bou di influensia di alkohòl.
A detené e sospechoso i a bai kuné warda pa hasi un análisis di rosea. Relashoná ku resultado di e análisis a kita su reibeweis i hiba e outo warda di polis pa ward’e.
Kiebro riba tereno di konstrukshon;
Riba djaweps 2 di mart a drenta keho di kiebro riba un tereno di konstrukshon situá na Kaminda Sorobon. Deskonosínan a kibra drenta un kònteiner di konstrukshon i a bai ku diferente hèrmènt, entre otro diferente tipo di zag, bormashin, vários bateria i un generator, tur di marka Dewalt, ta investigando e kaso.
Detenshon;
Alrededor di 3 or di mardugá riba djabièrnè 3 di mart, a detené un dama di inisial J.R.D.N. di 37 aña di edat riba Kaya L.D. Gerharts. Un patruya a topa ku e dama miéntras e tabata kana ta zeilu. E patruya a para pa chèk si tur kos ta oké kuné despues di kua e dama a kuminsá zundra i insultá e agentenan polisial. E tabata bou di influensia di alkohòl.
Outo ta bòltu;
Den oranan di mardugá riba djabièrnè 3 di mart un aksidente a tuma lugá riba kaya Internashonal. Pa motibu ainda deskonosí un outo a bòltu. E shofùr tabata na tinu i ambulans a hib’e hospital pa tratamentu médiko.
Bo a mira algu sospechoso? Yama POLIS na 717 8000 òf e liña di tep anónimo 9310.
===========================================
BròKèS 93.5 ………… Skuch’é!
.png)
