top of page
ggzsjjg.png

Notisia di polis di djaweps 25 di mei te ku djaluna 29 di mei 2023


Manehá bou di influensia ta kousa di aksidente

Riba djadumingu 28 di mei un aksidente entre dos outo a tuma lugá riba Kaya Korona. Pa motibu ainda deskonosí, un outo a dal den un otro outo ku tabata biniendo for di direkshon kontrali. A hasi un tèst di supla ku shofùr di outo ku a okashoná e aksidente. En konekshon ku resultado di esaki, a detené i a hib’é warda di polis pa un análisis di rosea. A konfiská reibeweis di e dama sospechoso di inisial N.G.J. di 76 aña di edat.


Detenshon pa manehá bou di influensia

Riba djadumingu 28 di mei a detené un hòmber di inisial G.E.S.O. di 51 aña di edat en konekshon ku manehá bou di influensia. Un patruya a spòt e vehíkulo riba Kaya L.D. Gerharts na momentu ku e tabata kore meimei di kaminda. A dun’é señal pa para na altura di Kaya Sonmontuno. Despues di kòntròl mas aleu a resultá ku e no tabata disponé di un reibeweis bálido ni tampoko un prueba di seguro bálido. A hasi un tèst di supla kuné i en konekshon ku e resultado a detené. El a haña un prosèsferbal pa manehá sin reibeweis i sin prueba di seguro.


Detenshon pa buracheria públiko

Riba djasabra 27 di mei a detené un hòmber di inisial R.J.J. di 71 aña di edat en konekshon ku buracheria públiko. Despues di orario di sera, e sospechoso no tabata ke bai for di un bar. Despues ku polis a dun’é òrdu pa bandoná e sitio, el a purba uza violensia i a detené.


Aksidente ta kondusí na detenshon

Den oranan trempan di anochi riba djabièrnè 26 di mei, un aksidente entre dos outo a tuma lugá riba Kaya Nikiboko Nort. Despues di kòntròl, un di e shofùrnan no por a mustra un prueba di identifikashon bálido. Pa e motibu aki a detené e dama di inisial N.C.M.Z. di 47 aña en konekshon ku violashon di Lei di identifikashon BES. Despues di investigashon a resultá ku e dama tabata permanesé di forma ilegal riba e isla i mester a bandoná e isla.


Trùk a bòltu

Den oranan di mardugá riba djabièrnè 26 di mei, un aksidente ku un trùk a tuma lugá na Santa Clara. E shofùr a deklará ku el a bai hala pa un otro trùk i a pèrdè kòntròl, dal den e trùk i bòltu. Ambulans a transportá e shofùr pa hòspital pa tratamentu médiko.


Aksidente

Riba djaweps 25 di mei un aksidente entre dos outo a tuma lugá riba Kaya Nikiboko Nort. A sera e krusada di Kaya Nikiboko Nort i Kaya Pos di Amor un ratu pa polis i ambulans por a ehekutá nan trabou. Ambulans a transportá e shofùr i pasahero di un di vehíkulonan pa hòspital pa tratamentu médiko. Un ratu despues a transportá e shofùr pa Kòrsou pa tratamentu médiko mas avansá.


Aksidente ta terminá den bringamentu

Riba djaweps 25 di mei un aksidente entre un outo i un ‘crosser’ a tuma lugá riba Kaya Dialma. Na yegada di patruya na e sitio, no por a haña e ‘crosser’ niun kaminda. Personal di ambulans a trata shofùr di e ‘crosser’ na e sitio mes. Un ratu despues un bringamentu a tuma lugá. Dos hòmber ku ta famia di shofùr di e ‘crosser’, pa motibu ainda deskonosí, a maltratá un otro hòmber ku un pata di kabra. Mas despues a detené ámbos hòmber pa violensia públiko i pa maltrato ku un arma. Ta trata aki di un hòmber di inisial R.F.S. di 49 aña di edat i un hòmber di inisial W.G.S. di 23 aña di edat. Mas despues a haña e ‘crosser’ i a konfiská esaki. Ta investigando e kaso.


Ladronisia di blòki di yerba

Riba djaweps 25 di mei a drenta keho di ladronisia di 15 blòki di yerba for di riba e tereno di LVV situá na Kaminda Lagun. E blòkinan di yerba tabata poné pa seka pa sirbi komo kuminda pa kabritu i karné. Investigashon den e kaso ta andando.


BròKèS 93.5 ………… Skuch’é!

3 views

Comments


BROKES 93.5 - Mas i Mas ta skuch'e

Kontakto

Buskando mas informashon?
Tuma kontakto ku nos awe mes.

STUDIO; +599 701 0935

Djòni Leoneta; +599 786 9091

Ethel Leoneta; +599 796 9133

Djaluna pa djabièrnè

8or di mainta pa 6or di atardi

  • Instagram
  • YouTube
  • Facebook

Danki pa komunuika ku nos!

Nos Klientenan Felis

"Add a testimonial that a happy customer or client has said about working with you."

Amanda Johns, COO, HORIZON

Diamonds Music Logo.jpg
mcb.png
Untitled_edited.jpg
Logo - My Eye Optical.jpg
Bashi.png
bottom of page