Kachó peligroso; Djaluna 27 di mei, alrededor di 1 or di mèrdia, polis a risibí notifikashon ku un kachó agresivo a morde un mucha na un kas na Kaya Pueblo. E persona ku a mèldu a deklará ku esaki no ta e promé biaha ku e kachó a morde hende. Polis en bèrdat a duna doñonan di e kachó un atvertensia diferente biaha kaba.
Na yegada di patruya mesora nan a bai buska e kachó i su doño. Na un kas riba e kaya menshoná a topa ku un dama ku ta kuida e kachó. El a deklará ku e no ta doño di e kachó. E kachó ta bini kada ratu den su kurá, miéntras e doño mes ta biba riba Kaya Seminole. E habitante a sigui deklará ku e doñonan no ke e kachó mas.
Dos siman pasá e kachó a laga un mucha di dos aña kai i a resultá heridá.
Pa motibu di e insidentenan aki, a disidí pa pone dòkter di bestia na altura pa pasa e kachó angua. Na yegada di e dòkter di bestia, e kachó a bula for di kurá i a hui.
ATVERTENSIA: Atrobe polis ta hala atenshon di doñonan di kachó pa tene kachónan den kurá, pa medio di un kurá bon será for di kual e kachónan no por sali i/òf pa mara e kachó pa prevení tipo di situashonnan asin’aki.
Abo komo doño ta responsabel pa komportashon i treinen di bo kachó
Detenshonnan pa manehá bou di influensia; Djaluna 27 di mei, alrededor di 9 or di anochi, a detené un dama di inisial O.A.H. di 40 aña di edat riba Kaya Grandi pa manehá bou di influensia di alkohòl. E sospechoso tabata enbolbí den un aksidente entre dos outo riba e kaya menshoná. Despues di hasi un tèst di supla a resultá ku e dama a konsumí mas alkohòl ku ta permití i a base di esaki a konfiská su reibeweis.
Djamars 28 di mei, alrededor di 3.25 or di mardugá, polis a para shofùr di un skuter riba Kaya Maximiliana Rosario pa un kòntròl rutinario. Durante di e kòntròl a resultá ku e tabata bou di influensia di alkohòl. A konsekuensia di un tèst di supla ku a hasi kuné, a resultá ku el a konsumí mas alkohòl ku ta permití. E sospechoso a haña un prohibishon di manehá di 1 ora.
Djárason 29 di mei, alrededor di 2 or di mardugá, a detené un hòmber di inisial B.A. di 25 aña di edat pa manehá bou di influensia di alkohòl. E sospechoso tabata manehá un skuter riba Kaya Korona na momentu ku un patruya a par’é pa un kòntròl. A hasi tèst di supla kuné i a resultá ku el a konsumí mas alkohòl ku ta permití ora ta manehá un vehíkulo. Komo konsekuensia di e resultado el a haña prohibishon pa manehá di tres ora.
.png)
Kommentit