Detenshon pa neglishá òrdu di polis
Alrededor di 3’or di mardugá riba djárason 22 di mart, a detené un hòmber di inisial R.R.D. di 17 aña di edat na Amboina. A duna e sospechoso òrdu pa para despues ku el a pasa ku su outo den direkshon prohibí. El a neglishá òrdu diferente biaha i a sigui kore. Despues di un persekushon kòrtiku, e sospechoso a para i a detené pa no duna oido na òrdu di polis. A hiba e outo warda di polis.
Prohibishon pa manehá Durante oranan di anochi riba djaweps 23 di mart a detené un hòmber di inisial O.v.K. di 21 aña di edat en konekshon ku manehá bou di influensia. E sospechoso ku tabata kore riba un skuter a haña òrdu pa para pa un kòntròl rutinario. E no por a mustra un reibeweis bálido i tampoko un prueba di seguro bálido i pa esaki el a haña un prosèsferbal. A hasi tambe un tèst di supla kuné, despues di kua a bai kuné warda di polis pa un análisis di rosea. E sospechoso a haña prohibishon di 1 ora pa manehá.
Kòntròl di tráfiko
Durante oranan di anochi riba djaweps 23 di mart a tene un kòntròl di tráfiko planiá riba Kaya Internashonal. Durante di e kòntròl aki a para i kontrolá un total di 13 vehíkulo. A duna un total di 11 prosèsferbal.
Esaki tabata pa e siguiente violashonnan:
7x pa manehá sin faha di seguridat bistí
3x pa manehá sin seguro bálido
1x manehá sin hèlm bistí
Bisti bo faha pa bo mes seguridat. Un faha di seguridat ta protehá okupante di un outo durante di un aksidente. Dor di uza e faha e persona protehá ta keda sinta riba su stul, no tin e posibilidat pa dal su kabes den winshil i no ta keda bentá den e outo p’aki p’aya. Dor di bisti bo faha di seguridat bo chèns di tin un aksidente mortal ta bira ménos. Tambe patras den outo bo tin ménos chèns di keda heridá seriamente.
Bo no ta kumpli ku reglanan? Bo por haña un but.
E suma di un but pa e violashonnan menshoná ta varia entre $30 te ku $225.
Korementu di outo bou di influensia
Riba djabièrnè 24 di mart a detené un hòmber di inisial R.R.Q. di 41 aña di edat en konekshon ku manehá bou di influensia. A spòt e sospechoso ta kore zeilu riba e rotònde dilanti misa di Playa. A dun’é òrdu pa para i na promé instante e no a duna oido na òrdu di polis. Finalmente el a para i durante kòntròl e no por a mustra un reibeweis bálido i tampoko un prueba di seguro bálido. Pa motibu ku e tabata probablemente bou di influensia di alkohòl, a bai kuné warda di polis pa hasi un análisis di rosea. A hiba e skuter tambe warda di polis i por pasa buska esaki te na momentu ku presentá ku un reibeweis i seguro bálido.
Detenshon en konekshon ku violashon di Lei di Opio BES
Riba djabièrnè 24 di mart a detené un hòmber di inisial D.G.M.C. di 42 aña di edat riba Kaya Caribe en konekshon ku violashon di Lei di Opio BES. E hòmber tabata drumi den su outo, ku tabata stashoná kantu di kaminda. E motor i lus di e outo tabata ainda sendé. Den e outo tabatin artíkulonan pa prosesá droga i tambe un kantidat di produkto paresido na hash. E hòmber tabata mustra tambe di ta bou di influensia di alkohòl. A konfiská e droga i bai ku e outo warda di polis.
===========================================
BròKèS 93.5 ………… Skuch’é!
.png)
Comments