top of page
ggzsjjg.png

Informashon Polisial; 29 Aprel te ku 3 di Mei 2024

Aksidente ku skuter; Djaluna 29 di aprel, alrededor di 9.25 or di mainta, un aksidente a tuma lugá riba bulevar Julio A. Abraham. Shofùr di un skuter a wanta brek muchu fuerte dilanti di un drèmpel despues di kua el a pèrdè kòntròl i kai na suela. E víktima a haña raskunan i ambulans a transport’é pa hòspital pa tratamentu médiko.



Dos aksidente na mesun momentu; Den oranan di atardi djaluna 29 di aprel, un aksidente entre un pikòp i un skuter a tuma lugá riba Kaya Grandi. E pikòp a dal den e skuter pa motibu ku e shofùr di e pikòp no a wak e skuter.

Despues a drenta un di dos notifikashon di un aksidente na e mesun sitio. Un outo di famia a dal patras di un skuter. No tabatin herido.


Dos detenshon pa ladronisia i enkubrimentu; Djaluna 29 di aprel, alrededor di 8.35 or di anochi, a detené un hòmber di inisial K.Q.D.A. di 20 aña di edat riba Kaya Sofaya i un hòmber di inisial R.S.D.W. di 19 aña di edat riba Kaya Taki.

Ambos detenshon ta den kuadro di un investigashon relashoná ku kasonan di ladronisia di vehíkulo último tempu, entre otro E-bikes i skuter.


Aksidente entre outo i skuter; Djamars 30 di aprel, alrededor di 6.50 or di mainta, un aksidente entre un outo i un skuter a tuma lugá riba Kaya International na altura di e rotònde. E outo a dal e skuter. E shofùr di e outo a deklará ku e no a mira e skuter ètòl.

E shofur di e skuter a haña raskunan i personal di ambulans a dun’é tratamentu médiko na e sitio mes i e no mester a bai hòspital.


Detenshonnan pa manehá bou di influensia; Den oranan di mardugá riba djárason 1 di mei, alrededor di 1.40 or di mardugá, a detené un hòmber di inisial J.A.P.M. di 23 aña di edat riba Kaya Neerlandia pa manehá bou di influensia di alkohòl. E sospechoso tabata enbolbí den un aksidente entre dos outo riba Kaya Amsterdam i despues el a sigui kore bai. Despues un patruya a mira e outo ku tabata kuadra ku deskripshon riba bulevar Gobernador N. Debrot. A duna e shofùr señal pa para riba Kaya Neerlandia, di kual el a kumpli. A hasi un tèst di supla kuné i a resultá ku el a konsumí mas alkohòl ku ta permití. A konfiská su reibeweis.


Djárason 1 di mei, alrededor di 2.50 or di mardugá, polis a risibí notifikashon tokante un aksidente riba Kaminda Gurubu. Pa motibunan te ainda deskonosí, un outo a drenta mondi. Ambulans a transportá e víktima pa hòspital pa tratamentu médiko. Debí na e aksidente, a sera e kaya parsialmente pa e servisionan konserní por a hasi nan trabou. Miéntras ku e agentenan tabata dirigí tráfiko, a para shofùr di un motosaikel pa motibu ku e no por a sigui kore dor di e aksidente menshoná. A hasi un tèst di supla kuné i a resultá ku el a konsumí mas alkohòl ku ta permití. Pa tal motibu konfiská su reibeweis.


Detenshon pa violashon di Lei di Identifikashon; Djárason 1 di mei, alrededor di 5.45 or di mardugá, a detené un hòmber di inisial J.S.L. di 26 aña di edat riba Bulevar Julio A. Abraham pa violashon di Lei di Identifikashon BES. A topa ku e sospechoso, ku tabata kuadra ku e deskripshon, den un pikòp despues ku polis a haña notifikashon di un intento di kiebro na un akomodashon turístiko riba e kaya menshoná. E sospechoso no por a identifiká su mes na promé instante. Ademas e sospechoso a gaña e agentenan polisial diferente biaha i no tabatin motibunan bálido pa tabata den serkania di e akomodashon turístiko den e oranan ei. Ta investigando e kaso.


Ladronisia for di den kurá; Djaweps 2 di mei a drenta keho di ladronisia di un generator koló hel ku pretu i ámbos lus di patras di un pikòp di e marka Toyota modelo Hilux for di den kurá di un kunuku situá na Bario Mexico. Deskonosínan a bai ku esakinan.


Aksidente Kaya Neerlandia; Djaweps 2 di mei, alrededor di 12.05 or di mèrdia, polis a risibí notifikashon tokante un aksidente entre un outo i un skuter riba Kaya Neerlandia.

Shofùr di e outo a deklará ku e kier a lora na e pòmp di gasoline i na e momentu ei un skuter ku tabata bini for di direkshon kontrali a dal den su outo. E shofùr di e skuter a resultá heridá i ambulans a transport’é pa hòspital pa tratamentu médiko.


Pikòp na kandela; Djabièrnè 3 di mei, alrededor di 2.25 or di mardugá, a drenta notifikashon di un pikòp ku tabata na kandela dilanti di un kas riba Kaminda Djabou. Na momentu ku e patruya a yega, esnan presente a paga e kandela kaba ku un slan di kurá. Esnan presente a deklará ku nan a tende un zonido i a mira ku e pikòp menshoná tabata na kandela. Brantwer a bini na e sitio pa kontrolá ku e kandela tabata bon pagá.

Brantwer i departamentu forénsiko di polis a hasi un investigashon pa sa kousa di e kandela. Probablemente ta intenshonalmente a pega e vehíkulo na kandela i p'esei a konfiská esaki pa investigashon mas aleu.


Kòntròl di velosidat Kaya Amsterdam; Durante oranan di mainta riba djaweps 2 di mei, polis a tene un kòntròl di tráfiko dirigí riba velosidat di vehíkulonan.

E kòntròl di tráfiko a tuma lugá riba Kaya Amsterdam. A midi velosidat di e vehíkulonan ku tabata aserkando ku un mididó di velosidat spesial (lasergun).

Riba Kaya Amsterdam e velosidat máksimo ku ta permití ta 40 km pa ora. Durante e kòntròl a midi velosidat di un total di 15 vehíkulo i a duna 4 shofùr un but pa surpasá e velosidat máksimo ku ta permití. E velosidat ku a midi tabata entre 50 pa 65 km pa ora.






2 views

Comentários


BROKES 93.5 - Mas i Mas ta skuch'e

Kontakto

Buskando mas informashon?
Tuma kontakto ku nos awe mes.

STUDIO; +599 701 0935

Djòni Leoneta; +599 786 9091

Ethel Leoneta; +599 796 9133

Djaluna pa djabièrnè

8or di mainta pa 6or di atardi

  • Instagram
  • YouTube
  • Facebook

Danki pa komunuika ku nos!

Nos Klientenan Felis

"Add a testimonial that a happy customer or client has said about working with you."

Amanda Johns, COO, HORIZON

Diamonds Music Logo.jpg
mcb.png
Untitled_edited.jpg
Logo - My Eye Optical.jpg
Bashi.png
bottom of page