Ladronisia di skuter
Riba djadumingu 27 di ougùstùs a drenta keho di ladronisia di un skuter koló shinishi skur di e marka Kymco, modèl Agility, ku plachi di number MF-1356. E skuter tabata stashoná na un akomodashon turístiko situá na Kaya Yuma i deskonosínan a bai kuné entre 1.30 or di mardugá i 8.30 di mainta. Ta investigando e kaso.
Ladronisia di bròmer
Riba djasabra 26 di ougùstùs a drenta keho di ladronisia di un bròmer. E bròmer tabata stashoná dilanti di un kas na Kaya Karaña. Entre djabièrnè 25 di ougùstùs i djasabra 26 di ougùstùs, deskonosínan a bai ku e bròmer. Ta investigando e kaso.
Detenshon pa maltrato
Den oranan di anochi riba djasabra 26 di ougùstùs a detené un dama di inisial L.M.M. di 21 aña di edat. E dama a maltratá un hòmber ku un kuchú. Investigashon den e kaso ta andando.
Riba djabièrnè 25 di ougùstùs a detené un hòmber di inisial J.A.M.C. di 55 aña di edat na Kaya Avelino J. Cecilia pa maltrato ku un arma. E hòmber a maltratá un dama ku un machete. A konfiská e machete i a hiba vehíkulo di e sospechoso warda di polis. Ta investigando e kaso.
Kòntròl di tráfiko planiá
Riba djasabra 26 di ougùstùs, alrededor di 9.45 or di anochi a tene un kòntròl di tráfiko planiá na Kaya Libertador Simon Bolivar. E kòntròl tabata den kuadro di tin un reibeweis bálido i dokumentonan di seguro bálido.
Durante e kòntròl a para i kontrolá 12 vehíkulo. A duna tres (3) prosèsferbal pa manehá sin reibeweis bálido.
KPCN ta hala atenshon di un i tur pa nan tin e dokumentunan nesesario, na òrdu. Tambe ta konsehá estriktamente pa kumpli ku e reglanan di Lei di Tráfiko. Den e dianan binidero, polis lo sigui tene e tipo di kòntròlnan aki.
Bo no ta kumpli ku reglanan? Bo por haña un but. E suma di un but pa e violashonnan menshoná ta varia entre $30 te ku $225.
Detenshon pa ladronisia
Alrededor di 2.15 or di atardi riba djasabra 26 di ougùstùs, a detené un hòmber di inisial E.A.R.M. di 42 aña di edat pa ladronisia i un dama di inisial M.M.M. di 34 aña di edat pa ladronisia i pa insultá un ámtenar den funshon.
A gara e hòmber den un supermerkado na momentu ku e tabata ke bai ku merkansia sin paga. E dama tabata wardando e hòmber den outo. A konfiská e outo ku e sospechosonan tabata kore aden i diferente komestibel. Ta investigando e kaso.
Detenshon pa manehá bou di influensia
Den oranan di mardugá riba djasabra 26 di ougùstùs a detené shofùr di dos skuter pa manehá bou di influensia. A para e sospechosonan riba Kaya Gilberto F. Croes i Kaya Libertador Simon Bolivar pa un kòntròl rutinario. Durante e kòntròl a resultá ku nan tabata bou di influensia di alkohòl. A konsekuensia di e resultado di e tèst di supla ku a hasi, a detené ámbos shofùr. Ta trata di un hòmber di inisial P.d.R. di 18 aña di edat i un dama di inisial M.G.C. di 21 aña di edat.
Aksidente
Alrededor di 2 or di mardugá riba djasabra 26 di ougùstùs un patruya a topa ku un outo di bòltu banda di kaminda riba Bulevar E.E.G. na altura di ‘Donkey Beach’. Na yegada di e patruya e shofùr tabata ainda den e outo. A hasi un tèst di supla ku e shofùr pa motibu ku e tabata papia ku lenga pisá i no por a para riba su pianan. Resultado di e tèst di supla tabata motibu pa a detené. Pero pa motibu ku e tabatin glas kibrá den su pia a konsekuensia di e aksidente, ambulans a transport’é pa hòspital pa tratamentu médiko.
BròKèS 93.5 ………… Skuch’é!
.png)
