Den òktober último pa medio di un komunikado di prensa, dr. Willem Cecilia a trese dilanti ku dia 15 di mart 2023 un elekshon regular pa konseho insular di Boneiru lo tuma lugá. Den e elekshon menshoná 9 miembro pa konseho insular di entidat públiko di Boneiru lo keda direktamente eligí pa esan residensiá na Boneiru ku derecho pa voto.
E derecho di voto ta enserá ku mester ta minimalmente 18 aña dia di elekshon i inskribí na Boneiru dia di kandidatura.
Ménos konosí pero eksistente ta e elekshon pa un kolegio elektoral. Pa medio di e kolegio elektoral residentenan hulandes ku derecho pa vota tin influensia indirekto riba e komposishon di e senado hulandes, esta e ‘Eerste Kamer’.
Den elekshon benidero ku ta tuma lugá na mes momento ku esun di konseho insular, residentenan hulandes so, ku derecho di voto ta skohe 9 miembro pa e kolegio elektoral i e 9 miembronan elegí na nan turno lo vota pa skohe miembronan di Eerste Kamer.
E pregunta spesífiko a bin dilanti serka dje segun Cecilia ta ken tin derecho di voto òf ku otro palabra ken por vota den e elekshon benidero. Cecilia ta indiká ku suidadanonan ku no tin nashonalidat hulandes no por vota pa e kolegio elektoral.
Di otro banda dia 14 di òktober 2014 e parlamento hulandes a aprobá un amienda di e Ley Elektoral ku ta hasi posibel ku suidadanonan ku no tin nashonalidat hulandes, por partisipá na elekshon pa konseho insular di Bonaire, Saba i St. Eustatius. Suidadanonan ku no tin nashonalidat hulandes segun Cecilia por partisipá na e elekshon pa konseho insular komo votadó pero tambe por pone nan mes kandidato riba un lista di un agrupashon òf partido polítiko.
Pa loke ta trata e elekshon pa konseho insular dia 15 di mart di otro aña un siudadano ku no tin nashonalidat hulandés pero ku kier ehersé su derecho di eligibilidat aktivo, pues su derecho pa vota, òf su derecho pasivo, ku ta su derecho di keda elegí, e mester ta permanesé legalmente durante un periodo di por lo menos sinku aña na Boneiru, Saba, St. Eustatius òf na Hulanda midí for di e dia promé ku e postulashon di kandidatonan ku ta 29 di yanüari 2023, i dia 30 di yanüari 2023 inskribí na e entidat públiko segun Cecilia.
Otro kriterio ta ku e siudadano ku tin nashonalidat hulandes i tambe e no hulandes riba dia di elekshon ku ta 15 di mart 2023 mester tin 18 aña bai ariba i no por ta ekskluí di e derecho di voto.
E entidat públiko ta derivá e derecho di voto for di e atministrashon básiko di dato personal. Si bo ta inskribí den e atministrashon básiko i bo ta kumpli ku e kriterionan, outomátikamente bo ta risibí bo karchi di voto.
Ta rekomendabel pa tuma kontakto ku registro sivil di Boneiru pa averiguá si realmente bo persona ta registrá komo votadó.
Si esaki no ta e kaso i bo ta konbensí di ta kumpli ku tur kriterio, por hasi un apelashon pa kambio den e registro tresiendo naturalmente tur dokumentashon pa prueba ku bo ta kumpli ku tur kriterio. Asina Dr. Willem Cecilia ta terminá su komunikado.
.png)
Комментарии