Despues ku temporada di futbòl 2023- 2024 ta tras di lomba, direktiva di Atlétiko Flamingo no ta sintando ketu, i ta trahando tantu riba posibel atkisishon di hungadó pa djòin e ekipo, komo tambe su kuerpo tékniko.
Awe djaluna 29 yüli direktiva di Atlétiko Flamingo, ofisialmente a anunsiá Rogyear Anita komo ‘Head Coach’ nobo. Te ku kampionato pasá Anita tabata e kapitan di e onsena oraño, i awor pues a tuma e enkargo di dirigente prinsipal i den e kaso aki direktor tékniko pa e temporada benidero.
Ta konosí ku despues di kampionato pasá, algun desaroyo inesperá a presentá den Atlétiko Flamingo, pero tur kos ta indiká ku dirigentenan di e organisashon a tuma tur eseinan ku kabes friu, i ta trahando trankilamente pa kampionato binidero demostrá ku ketu bai e ‘kandela den pipa’ ta sendé sendé.
Nombramentu di Anita komo Head Coach lo por trese desaroyonan interesante pa lokual ta trata atkisishon di hungadó ku lo firma ku e ekipo di Nikiboko. Anita e hòmbu di ‘muchu palabra, ta bira boroto’ fuera di ta konosí komo un sòldá ku ta duna tur ku tin riba tereno, e ta tambe un ‘trèk pleistu’ pa hala hungadó trese den kualke ekipo na kual e ta pertenesé. Ta kuestion di dia i posiblemente ora, ku por bai spera mas anunsio ofisial interesante di parti direktiva di Atlétiko Flamingo.
Direktiva, miembro i fanátikonan ta deseá Anita tur klase di éksito den su funshon nobo.
.png)
Comentários