Minister Dijkgraaf ta papia ku studiantenan di MBO Bonaire tokante historia di sklabitut

Djabièrnè último minister Robbert Dijkgraaf a bishitá MBO Bonaire. Ei el a papia ku studiantenan tokante e konsekuensianan di sklabitut ku ainda ta visibel. Ku un baile studiantenan a ekspresá kiko nan ta sinti i kiko nan ta pensa di sklabitut. Despues nan a presentá e minister algun pregunta krítiko.

E enkuentro ku e minister di Enseñansa, Kultura i Media a kuminsá ku un baile presentá pa studiantenan di e sektor di Servisio. Pa hopi studiante ta fèrfelu pa papia na hulandes tokante sklabitut. Nan no ta dominá e idioma sufisientemente pa ekspresá nan sintimentunan ku palabra. Ku un baile impreshonante, kreá pa e studiantenan mes, nan a ekspresá loke nan ta pensa i kon nan ta sinti.

Despues di e baile a papia tokante e diskulpa pa sklabitut di promé minister Rutte. Entre otro tokante momentu di e diskulpa i e diferensianan bisto ainda entre Hulanda Europeo i Boneiru, komo konsekuensia di e historia di sklabitut. E studiantenan ta puntra si, awor ku a pidi despensa, lo bini kambio. E studiantenan a duna un impreshon di e diferensianan den oportunidat, fasilidat i suèldo. Asina hopi studiante mester traha banda di nan estudio pa yuda nan famia finansieramente. Ta mashá difísil pa logra bai biba riba bo mes komo studiante. Gastunan di bibienda ekonómiko i kosto di bida ta haltu.

Liset de Keijzer, direktor interino di unidat di MBO Bonaire, ta elogiá perseveransia di e studiantenan: “Eksigensianan di kalidat di Hulanda ta pèrkurá pa un estudio na nivel haltu. Komo ku hopi studiante no ta dominá idioma hulandes asina bon, esaki ta eksiguí hopi di nan. E kombinashon di traha i siña ta pisá i un reto diario. Mi ta mashá orguyoso di nos studiantenan i e koleganan ku ta guia nan tur dia.”

E studiantenan ta gradesido ku minister Dijkgraaf a tuma tempu pa skucha nan. “Nos ta spera di mira e kambionan riba nos dushi Boneiru den futuro.”

Despues Klaske Apperloo, Presidente di Hunta di Maneho di Scholengemeenschap Bonaire i Liset de Keijzer a papia ku minister Dijkgraaf tokante finansiamentu di estudio i e nesesidat di bibienda pa studiante pagabel. Ademas a papia tokante desafionan di MBO Bonaire riba e tereno di idioma ku kambionan di lei ku ta sigui i e kolaborashon ku MBO na Hulanda i den regio.

Minister Robbert Dijkgraaf ta ku bishita di trabou na Boneiru, Aruba i Kòrsou pa e Konsulta ministerial di kuater pais i konmemorashon di historia di sklabitut.

===========================================

BròKèS 93.5 ………… Skuch’é!