Djabièrnè último 19 yüni gerente di Mental Health Caribbean, sr. Eric Jansen i presidente di AFBW, sCherel Kwidama den presensia di gerensia di MHC, pero tambe den presensia di shopsteward nan i konsehero Nòchi Willem a firma e konvenio di rekonosimentu.
Ta asina ku durante negosashon entre Fundashon Mariadal na Boneiru, Saba Cares di Saba, Auxiliary Home i SEHCF di Statia komo dunadónan di trabou i na e otro un banda AFBW pa Boneiru, SUPLUA na Saba i ALL FOR ONE na Statia, MHC tambe a sinta na mesa ku e deseo pa nan usa e CAO kolektivo tambe pa nan personal. AFBW a bai di akuerdo i a haña tur koperashon di gerensia di MHC pa organisá e trahadónan den e sindikato. Al fin al kabo e sindikato ta sali na interes di e trahadónan i ta mas ku hustu i korekto ku e trahadónan ta haña un partisipashon real den negosashon di nan kondishonnan i sirkunstansia nan laboral.
E aserkamentu aki di AFBW a duna su resultado i e gran mayoria di e trahadónan di MHC a afiliá na e sindikato i tambe a apuntá e siguiente personanan komo delegadonan (shopstewardnan) di AFBW pa ta bos, wowo i orea di e sindikato riba flur di trabou.
Ta trata di Sra. Silenne Boelbaai, Narina Steenmijn i Caroll Poulina.
Djabièrnè último 19 yüni tabatin un enkuentro di será konosí entre gerensia di MHC bou di liderato di Eric Jansen, presidente di AFBW di Cherel Kwidama kompañá pa konsehero Nòchi Willem. Despues di a interkambiá den un forma ameno i positivo a pasa na firma e konvenio di rekonosimentu.
Esaki ta enserá ku MHC ta rekonosé AFBW komo e úniko representante legal di e trahadónan di MHC pa atendé ku e interesnan laboral di e trahadónan. Tambe a sondia e posibilidat pa e trahadónan di MHC na Saba i Statia tambe por afiliá na AFBW.
Riba e fotonan por apresiá e momento ku Eric Jansen pa MHC i Cherel Kwidama pa AFBW ta firma e konvenio di rekonosimentu i tambe momento ku e dos delegashonnan a inmortalisá e momento aki dilanti di e emblema di MHC. Ku esaki trahadónan di MHC tambe tin nan CAO ku lo tin balides te ku 31 di dezèmber 2026.
.png)
Commentaires