26 studiante di MBO Bonaire a risibí nan diploma MBO djaluna 30 di yanüari anochi. A otorgá e diplomanan na un manera festivo den e direkshonnan di estudio Kuido & Bienestar, Ekonomia & Atministrashon, Deporte & Moveshon, Turismo, Horeca i Media.
E entrega di diploma a tuma lugá den oula di Komunidat di Skol Bonaire, ku tabata debidamente dekorá pa e okashon. E studiantenan a risibí hopi atenshon. Riba muzik di un didjei e studiantenan a kana un pa un bai e tarima riba un pasarela di oro. Tabatin èkstra atenshon pa kuater studiante di e estudio Kolaboradó Atministrashon Finansiero i un studiante di e estudio Kòki. E studiantenan akí a kuminsá ku e estudio ku tin un durashon di dos aña. Pa medio di gran esfuerso i dedikashon, nan a finalisá e estudio den un tempu mas kòrtiku. Pa e motibu ei, posteriormente nan lo risibí un distinshon spesial durante un lùnch ku direktor di unidat interino di MBO Bonaire, Liset de Keijzer.
Diferente dosente tabata presente na e entrega di diploma, pa personalmente felisitá nan studiante. Na nòmber di MBO Bonaire dosente Willemijn Wilms a ekspresá palabranan spesial di gradisimentu. El a enfatisá kon importante tur e dosentenan ta pa MBO Bonaire. Spesialmente a menshoná dosente Shermanta Frans pa su gran prestashon. Shermanta i su studiante Karisa Thielman tabata visiblemente konmové.
Liset de Keijzer ta apresiá e kolaborashon ku e dosentenan enormemente. Banda di esei e ta mashá orguyoso di tur studiante: “Nan a traha duru pa e resultado final akí. E studiantenan a realmente meresé nan diploma. Na nòmber di henter MBO Bonaire, mashá pabien un biaha mas. Hopi éksito ku e siguiente pasonan den boso karera.”
===========================================
BròKèS 93.5 ………… Skuch’é!
.png)
Comments