Un di kada tres abitante di Hulanda Karibense ta biba den pobresa. Pa e motibu aki e gabinete aki ta saka 30 mion euro pa 2024, pa mehorá e forsa di kompra di e abitantenan di Boneiru, Saba i Sint Eustatius. Entrante 2025, e suma aki lo subi na €32 mion anualmente.
E sèn ta bai entre otro pa e oumento di benefisionan sosial na Hulanda Karibense na 2024, di kua ainda tin ku definí e oumento eksakto. Ku esaki e gabinete ta tuma pasonan importante pa yega na un mínimo sosial na Boneiru, Saba i Sint Eustatius. Tambe e kompensashon pa yu ta subi ku $90 pa mucha, pa luna. Esaki ta di akuerdo ku e ambishon pa baha pobresa infantil na mitar pa aña 2025. Mas aleu, e gabinete ta mantené e supsidio di energia di $1300 pa aña. Tambe e supsidio di e gastunan fiho di elektrisidat i e tarifa fiho di awa di bebe i e gastunan di konekshon pa internèt lo sigui baha. Ademas, tur aña tin sèn adishonal ta bai pa mehorá transporte públiko i pa baha gastu di transporte.
Sekretario di estado Van Huffelen: “Un dak riba kabes, kuminda riba mesa òf nesesidatnan èkstra pa mucha no ta algu natural pa hopi hende na Boneiru, Saba i Sint Eustatius. E gabinete aki ke hasi algu ku esaki. Pa e motibu aki mi ta kontentu ku huntu ku mi kolega Carola Schouten nos a logra reservá un montante grandi, no solamente pa e aña aki, pero tambe pa e añanan benidero, pa mehorá bida di e abitantenan di e tres islanan. Na promé lugá dor di sigui oumentá e benefisionan sosial, pero tambe dor di sigui kontribuí na servisio básiko manera awa i elektrisidat. Nos no a yega ainda, pero e ta un paso importante pa enfrentá pobresa na e islanan. P'esei tambe mi ta ansioso pa e konklushonnan di e komishon di mínimo sosial. Den e sabiduria ku Reino, empresario, organisashon públiko i abitante ta nesesariamente dependé di otro pa krea un nivel di servisio ekivalente i pa baha e gastunan di bida.”
BròKèS 93.5 ………… Skuch’é!
.png)
Comments