Maduro & Curiel’s Bank (MCB)ku Transishon di Liderazgo. Chicu Capriles a Anunsiá Intenshon di Retirá

Maduro & Curiel’s Bank (MCB) ta anunsiá un futuro transishon di liderazgo. Lionel Chicu Capriles II, ku ya pa dos dékada ta Presidente i CEO, a anunsiá su intenshon di bai retirá.

MCB su Hunta di Komisario a inisiá e proseso pa haña un susesor pa liderá MCB Group.

Den un aklarashon riba su desishon, Chicu ta bisa: “Ta un berdadero honor pa liderá nos Grupo MCB, pa traha ku koleganan asina ekstraordinario, i humilde di ta den un posishon pa hasi kontribushonnan asina importante na e komunidatnan ku nos tin plaser di sirbi i yama kas. Después di kasi 33 aña di servisio na  Banko, sínembargo, ta tempu pa mi pasa e batuta pa un líder nobo. Banko ta fuerte, resiliente i sólido i nos kompromiso pa sirbi nos klientenan den e komunidatnan ku nos ta orguyoso di por yama nos kas, ta firme.

Anunsiando e desishon aki delantá, nos Hunta di Komisario tin sufisiente tempu pa buska un susesor adekuá. Mientrastantu ta ‘business as usual’, pasó mi ta keda traha ku tur

mi energía i dedikashon pa sigurá un transishon fásil pa mi susesor na su debido tempu”.

Islay McGlynn, Presidente di e Hunta di Komisario: “Bou di liderazgo di Chicu MCB a kontinuá ku su trayektoria fuerte di kresementu. Komo é Banko di Karibe Hulandes, MCB ta aktivo den e ekonomianan i komunidatnan den kua e ta operá. Chicu a mantené su promesa di tene na haltu e balornan di famia, ku ta sinónimo na Banko for di día esaki a keda establesé na 1916,. Mientras Chicu ta kontinuá su ròl pa algún tempu, nos ta inisiá e proseso pa haña e siguiente Presidente i CEO di MCB.

Esaki ta suprayá e importansia pa haña un líder adekuá”.

E Hunta di Komisario a inisiá un proseso diligente i bon planiá pa identifiká un susesor, di kua por spera un anunsio den e diesdos lunanan binidero.

Ta buska un kandidato ku ta komprondé e balornan di e famia di MCB, ta komprometé su mes na e ekonomia i komunidatnan di nos islanan den Karibe Hulandes i ku ta kapasitá pa liderá e Banko den futuro. 

Prioridat di e Hunta ta pa sigurá un transishon suave i transparente, ku ta mantené e tradishon di stabilidat, ekselensia i servisio di MCB.

BròKèS 93.5 ………… Skuch’é!