Partido M21 ta boga pa un solushon urgente pa alohamentu di skol básiko 'Het Koraal'.
Sirkunstansianan insigur; Si no bini un solushon, no tin lugá pa e alumnonan ku a inskribí pa aña eskolar 2024-2025. Aparte di esaki e alumnonan aktual di skol básiko Het Koraal tin ku keda un aña mas den e dos kasnan di famia, kaminda na e momentu akí nan ta haña lès. E lokalidatnan akí ta leu for di ideal i nan no ta kumpli ku e eksigensianan di siguridat i di enseñansa. E situashon aktual ta trese sirkunstansianan insigur kuné, manera no sufisiente espasio será i un kurá seku i bashí ku ta sirbi komo lugá di hunga. Ademas tin falta di material esensial pa un desaroyo optimal di e muchanan, manera mobilario adekuá, bòrchi digital, espasio silensioso pa hasi tarea, huki pa lesa i mas.
Solushon ta urgentemente nesesario; Segun e Tratado di Derecho di Mucha tur mucha tin derecho riba bon enseñansa (artíkulo 28). Esaki ta nifiká ku tur mucha mester por bai skol i haña bon enseñansa den un forma ku ta pas serka nan.
Pa e motibu akí M21 ta boga pa un solushon urgente pa e situashon akí.
M21 ta seriamente preokupá tokante e 80 muchanan ku e aña akí ainda mester haña enseñansa den un alohamentu insigur i e 40 alumnonan ku no por haña lugá na skol básiko Het Koraal. Esaki ta un situashon alarmante.
Nos ta hasi un apelashon riba tantu entidat públiko Boneiru komo riba ministerio di Enseñansa, Kultura i Siensia pa yega rápidamente na un solushon.
.png)
Comments