Lansamentu di e buki ‘Marka Indjan’ di Delno (Denchi) Tromp ta tuma lugá den kolaborashon ku Biblioteka Públiko Boneiru. Ta tene lansamentu di e buki mañan djabièrnè 25 di novèmber na Biblioteka Públiko Boneiru na Kaya Gramèl s/n, 5or atardi.
Tur hende ta kordialmente bonbiní. Den e buki ta para ketu na pintura di indjan i e diferente áreanan kaminda e poblashon indígeno a laga marka atras na Boneiru. Despues ta sigui tambe un eksposishon di e buki ku públiko por bishitá te ku e promé siman di yanüari 2023 durante orario regular di biblioteka.
E buki ‘Marka Indjan’ ta un regalo spesialmente pa alumnonan di grupo 5 te 8 na Boneiru. Den e buki tin 39 pintura di indjan ku Denchi a prosesá gráfikamente. Den e buki ta para ketu tambe na e diferente áreanan kaminda e poblashon indígeno a laga marka atras na Boneiru.
Na papiamentu esakinan yama ‘Marka Indjan’. Te ainda por mira algun di e markanan akí na sierto partinan na Boneiru.
E markanan akí ta rekonosibel, pasobra nan ta pintá ku e mesun kolónan, esta korá kimá òf pretu.
Ta importante pa nos rekòrdá nos poblashon indígeno i e herensia balioso ku nan a laga pa nos, asina Denchi ta bisa tokante e buki. Tur kabes di skol, dosente i mayor ku ke sa mas tokante e buki tambe ta kordialmente bonbiní na lansamentu di e buki i na e eksposishon.
Publikashon di e buki ta un inisiativa di Delno (Denchi) Tromp i a bira posibel mediante un kolaborashon ku ministerio di Enseñansa, Kultura i Siensia área karibense, Rijksdienst Caribisch Nederland i Biblioteka Públiko Boneiru.
Ta presentá e buki den e idiomanan papiamentu, ingles i hulandes. Na ingles título di e buki ta ‘Indigenous Markings’ i na hulandes ‘Inheemse Sporen’.
===========================================
BròKèS 93.5 ………… Skuch’é!
.png)
Comments