Pa 6 aña konsekutivo, Komishon Sanikolas Boneiru(KSB) huntu ku Wedoe Entertainment a organisá yegada di Sanikolas na Boneiru di un forma éksitoso ku ayudo di gobièrnu i spònsernan ku tabata kere den nos organisashon i den e fiesta pa mucha aki.
Na aña 2017, Komishon Sanikolas Boneiru a tuma e batuta over for di (e tempu ei) Sentro Hubentut i Famia(SHIF) pa organisa e fiesta mas grandi di mucha aki. For di e tempu ei, por a tende gritunan di deskriminashon. KSB sinembargo a tuma e batuta over ku e pensamentu pa mantené e tradishon i no laga esaki bai pèrdí. Ounke ku sigun añanan tabata transkurí, por a tuma nota di ráfaganan di bientu ku poko poko tabata bira mas fuerte, ku tabata poderá den diferente huki pa kaba ku e fiesta di mucha. No opstante esaki, KSB a keda para duru i bringa pa nos muchanan por tabatin un temporada plasentero i a trata na mantené e tradishon. Semper nos a konsiderá e fiesta aki un fiesta pa trese alegria serka nos muchanan i un temporada pa premia nos muchanan su bon komportashon. Hamas tabata e intenshon pa niun hende sinti nan mes deskriminá ku e fiesta aki. Pesei tambe nos a trese varios adaptashon atrabes di añanan.
E echo ku e fiesta aki ta keda relashoná ku rasismo i ku tur influensia negativo ku esaki tin, ta pone un preshon grandi riba e organisashon i ta trese un smak amargo. E aña aki Komishon Sanikolas Boneiru atrabes di media, a haña di konosé ku a skohe un grupo nobo pa organisá e yegada di e Hòmber Santu. Nos ta deseá e grupo enkuestion hopi éksito i pa laga nos muchanan ta pará sentral pa disfrutá di e fiesta.
Komishon Sanikolas Boneiru i Wedoe Entertainment kier a gradisí kada boluntario, organisashon i spònsernan ku for di komienso a i a keda sostené e fiesta di nos muchanan. Pero tambe e multitut grandi ku tabata bini masalmente pa risibí Sanikolas i su pietnan den Playa.
Pa loke ta e aña aki un biaha mas, fiestanan privá di negoshi, fiesta di kas òf na skol, lo kontinuá den su bachi original i kustumbrá. Pa reservashon por tuma kontakto ku Grupo Positivo so na +599 777-8875.
BròKèS 93.5 ………… Skuch’é!
.png)
Comments