Kiko ta kuido kaloroso / kuido di famia

Djabièrnè 10 di novèmber a klousurá Dia Internashonal di Kuido Kaloroso ku un anochi di informashon na Captain Don’s Habitat pa 19.00 or i tabata spesial pa e kuidadó kaloroso i otro interesado di Fundashon Alzheimer Bonaire . Komo oradó a invitá Sra. Jet Thoonen , konsehero kuido di famia for di Curacao. Tema tabata ”Kiko ta kuido kaloroso / kuido di famia“ .

Sra. Thoonen a yega di duna mas treinen riba petishon di Fundashon Alzheimer Bonaire na kuidadónan kaloroso na Bonaire i djabièrnè anochi el a sa di enfoká na un manera ekselente kuantu balor un kuidadó kaloroso tin i a haña hopi pregunta di esnan presente i e por a duna tambe hopi konseho.

Miembronan di famia di personanan ku ta biba ku demensia i kuidadónan kaloroso presente a skucha ku masha atenshon i a kontribuí i hasi pregunta. Tabata un anochi interaktivo. Ta di sumo importansia pa Bonaire ku ta rekonosé e kuido intensivo di kuidadónan kaloroso pero tambe ku nan ta rekonosé nan mes komo un kuidadó kaloroso.

Direktiva ta wak bèk riba un anochi di informashon eksitoso ku ta parti di su programa anual i ta gradisí Sra. Thoonen pa su tempu pa trese e charla.

BròKèS 93.5 ………… Skuch’é!