Riba djamars 22 di ougùstùs a tene un kòntròl multidisiplinario na un negoshi na Boneiru. Bou di guia di Kuerpo Polisial Hulanda Karibense a tene un akshon den kolaborashon ku Inspekshon di Labor, e Servisio di Imigrashon i Naturalisashon Hulanda Karibense Koninklijke Marechaussee, e Direktorado di Supervishon i Mantenshon di Entidat Públiko Boneiru, e tim Multidisiplinario Marítimo Hub Boneiru (MMHB), Belastingdienst Hulanda Karibense i e Instituto Hudisial Hulanda Karibense. Dor di kolaborashon multidisiplinario por kontrolá mas lei pareu i tambe na kompanianan mas grandi.
Durante e akshon multidisiplinario a kontrolá entre otro si ta kumpli ku diferente lei riba tereno di labor i estranhero i estadia legal. E leinan aki tin komo meta pa sòru ku labor ta tuma lugá di manera honesto, seif i salú i pa komprobá ku e estranhero i e hulandes ta permanesé i traha di manera legal na Boneiru.
Asina e lei por ehèmpel ta pone un restrikshon pa ku e kantidat di oranan di trabou pa asina sòru pa trahadónan haña sufisiente sosiegu. Banda di esaki dunadónan di trabou mester tene nan mes na asuntunan manera suèldu mínimo, reglanan riba tereno di ofertaim i sòru pa seguridat na boka di trabou. No ta permití tampoko pa laga trahadónan prosedente di eksterior traha sin tin un pèrmit pa esaki. Dor di e legislashon aki ta protehá e merkado di labor i ta kombatí labor ilegal, eksplotashon di labor i konkurensia deshonesto.
E trahadónan serka kua a topa ku partikularidat pa loke ta trata nan pèrmit di estadia i di trabou, ta haña e oportunidat pa ainda pone esakinan na òrdu. Ta trata di mas o ménos 14 persona.
Pa promové i kontrolá kumplimentu di lei- i ordenansanan na vigor, e kadena di estranhero ta traha huntu ku mas regularidat i ta ehekutá kòntròlnan konhunto. Durante e kòntròlnan aki ta limitá molèster pa e kompania i eventual kliente/huéspet mas tantu posibel. Kuerpo Polisial Hulanda Karibense a guia e akshon aktual aki.
BròKèS 93.5 ………… Skuch’é!
.png)
Comments