Durante un reunión spesial i solèm di Konseho Insular, John Soliano a huramentá komo gezaghèber nobo di Boneiru. E huramentashon a tuma lugá riba djasabra 3 di ougùstùs 2024. Sekretario Insular Christopher Frans a fungi komo maestro di seremonia.
Grefir interino Mathilde Koetsier a lesa e dekreto di rei tokante nombramentu.
Soliano a huramentá dilanti Representante di Reino suplente Jan Helmond.
Despues di e huramentashon a firma e prosès ferbal ku ta forma parti di huramentashon. Helmond a bisti Soliano e kadena ofisial di gezaghèber.
Gezaghèber Soliano a duna su promé diskurso den su funshon nobo.
Den e diskurso akí el a enfatisá entre otro e retonan di gobernashon, i elaborá riba bon gobernashon, empatia i importansia di kombibí ku otro.
Na e okashon di huramentashon di John Soliana komo gezaghèber, e miembro di Konseho Insular Benito Dirksz komo presidente di komishon di konfiansa a hiba palabra.
Dirks a finalisá su diskurso bisando ku awor Soliano no ta tata di famia so, sino tata di pueblo tambe.
Na fin dje enkuentro solèm na Passangrahan, gezaghèber Soliano a klousurá pa di promé biaha e reunion di Konseho Insular.
.png)
Comments