Inskripshon pa kompetensia literario ‘Arte di Palabra’ a habri. Hóbennan di grupo ocho i di skol avansá por inskribí yenando un formulario ku nan por haña i entregá na SKAL òf haña riba página di Facebook di Arte di Palabra. Nan por partisipá den e kategorianan poesia original, poesia eksistente, kuenta original i òf kuenta eksistente. E kompetensia ta tuma lugá 27 di mei 2023. E aña akí tema di e kompetensia literario ta ‘Di aki mi ta, mi idioma ta mi kos.’
A skohe e tema akí pa enkurashá i konsientisá nos hóbennan tokante idioma na Boneiru. Idioma ta un vehíkulo importante pa nos identidat, nos bida. Idioma ta konektá abo i ami, p'esei ta importante pa hasi bon uso dje. Komishon Arte di Palabra Boneiru ta konvensí ku idioma ta e vehíkulo importante ku ta konektá nos tur ku otro.
Arte di Palabra ta originalmente un kompetensia anual di deklamashon na Papiamentu pa hóbennan den enseñansa avansá na Aruba, Boneiru i Kòrsou. Ta laga hóben di grupo ocho tambe partisipá. Esaki ta pa nan por entrená, prepará, sera konosí ku kompetensia di Arte di Palabra, pa siguiente aña nan por partisipá den kategoria di skol avansá.
E meta di Arte di Palabra ta pa kada isla ta tene su mes kompetensia i asina skohe e obranan ganadó pa bai kompetí ku hermana islanan. Komo parti di esaki, Boneiru a ranka sali ku su kompetensia pa aña 2023.
===========================================
BròKèS 93.5 ………… Skuch’é!
.png)
Comments