Despues di a lucha 13 aña largu, porfin ta bai stipulá un minimo sosial real pa habitantenan di Boneiru, St.Eustatius i Saba. Danki na partidonan polítiko D66 i Christen Unie tin un amienda ku ta bai ankra legalmente tur e rekomendashonnan di Komishon Thodé. Por lo menos ochenta miembro di 2e Kamer a firma e amienda. Konkretamente esaki ta nifiká ku benefisionan sosial lo bai oumentá i ku ya pa entrante promé di yüli 2024, nos habitantenan ta bai risibí un sueldo minimo realístiko di por lo ménos $ 1.750. Tambe a keda notifiká ku lo tin un kompensashon konsiderabel pa e dunadónan di trabou. E kompensashon aki lo bai evitá un spiral di preis i salario. Pa e kompensashon aki a reservá èkstra plaka den e presupuesto di Reino.
Awó ta resultá ku un kantidat di empresario (uní den e Diálogo Sentral) kier limitá tòg oumento di e sueldo minimo di moda ku nan empleadonan lo bai risibí sentenares di dòlar ménos ku Komishon Thodé minisiosamente a kalkulá siendo e sueldo ku minimalmente ta nesesario. Ku esaki e empresarionan kier desviá di e proposishonnan di Komishon Thodé. Unkobon ta hasi un yamada na Diálogo Sentral pa sobre todo aseptá integralmente e proposishonnan di Komishon Thodé. Nos habitantenan meresé dignidat i hustisia.
Rapòrt di Komisbon Thodé ta deskribí e medidanan konkreto ku ta hasi posibel introdukshon di e minimo sosial kalkulá, riba un tèrmino kòrtiku. Tambe Komishon Thodé a deskribí kon bon por kontrolá e rísikonan ekonómiko manera pèrdida di empleo i e spiral di prèis i salario. E tan temibel spiral di preis i salario ta bai wòrdu evitá komo ku Gobiernu Hulandes ta bai kompensá doñonan di trabou pa e gastunan salarial haltu. Esaki a keda aprobá den un moshon resientemente.
E partisipantenan na e Dialogo Sentral aparentemente ta mira spesialmente e risikonan. Risikonan ku tambe a keda deskribí den e rapòrt Thodé i ku a stipulá kon por kontrolá esakinan pa medio di un maneho flankeá manera por ehempel e kompensashon pa e gastunan salarial mas haltu. Eksaktamente pa esaki e moshon aseptá a tene kuenta ku né. Fuera di esei Dialogo Sentral ta ignorá e efektonan positivo di un sueldo minimo hustu i mas haltu, riba e forsa di kompra.
Unkobon ta pidi Dialogo Sentral pa sirbi awó interes di nos trahadónan pober. Porfin tin un avanse grandi despues di trabounan duru. Nos hendenan meresé un entrada di kual nan por biba, kome i bebe. Mester paga pa trabou ehersé. Pobresa mester keda eliminá. E avanse tan sperá aki ta básikamente un viktoria pa tantu e empresarionan komo pa e poblashon.
Ban traha huntu pa e adelanto aki i ban para spesialmente e diskushonnan engañoso.
BròKèS 93.5 ………… Skuch’é!
.png)
Comments