Islanan, inkluso esnan dentro di Hulanda Karibense, di manera fuerte i desproporshoná ta enfrentá e konsekuensianan di e krísis di klima. Den e kumbre di klima na Sharm-el-Sheikh (COP27) Hulanda a uni su mes na dos inisiativa pa promové kolaborashon riba akshon di klima entre isla chikitu mundialmente. Ta trata di inisiativa rondó di retonan riba tereno di klima i generashon di energia duradero.
Local2030 Islands Network
Ademas di Aruba, Boneiru i Kòrsou, awor Hulanda ku tur tres isla di Hulanda Karibense (Boneiru pero tambe Saba i Sint Eustatius) tambe ta konektá na e Local2030 Islands Network. Ku e ret aki Hulanda kier aselerá inovashon na Hulanda Karibense i promové interkambio di konosementu riba tereno di desaroyo di klima entre isla rònt mundu. E Local2030 Islands Network ta e promé ret mundial ku e islanan mes ta dirigí i ku via di solushon lokal ta komprometé su mes pa logra e Social Development Goals (SDG’s).
SIDS Lighthouse Initiative
Riba inisiativa di e Internationaal Agentschap voor hernieuwbare energie (IRENA) a krea e SIDS Lighthouse Initiative; un plan di akshon pa sostené isla chikitu den transishon di fuente di energia fósil pa energia renovabel. Aruba ya tabata afiliá na e inisiativa aki. Ku e islanan Boneiru, Saba i Sint Eustatius, Hulanda tambe a afiliá su mes. Di e manera aki Hulanda ke uni forsa pa sostené strategia di energia di islanan chikitu. Ku su konosementu tékniko i su ret internashonal Hulanda por duna un bon kontribushon na esaki.
Minister Jetten pa Klima i Energia: “Hulanda Karibense ya ta nota e konsekuensianan di kambio di klima. Si nos no hasi nada, e konsekuensianan aki ta bira aún mas grandi òf posiblemente ireversibel. Pa e motibu aki mi ke sòru konhuntamente pa e islanan no keda atras den e transishon. Nos mester sostené e islanan ku teknologia, konosementu i akseso na finansiamentu, pa por hasi e transishon pa un sistema di energia duradero.”
===========================================
BròKèS 93.5 ………… Skuch’é!
https://www.radio935bonaire.com
http://radio.garden/listen/bro-ke-s-93-5-fm-boneiru/a1YG6S77
https://www.basilachill.com/#!radio/radiobrokes
http://brokes935fm.radiostream123.com
https://liveonlineradio.net/radio-brokes-935-Radio
.png)
