Riba 4 di sèptèmber último, Gang di Arte Bonaire a ranka sali ku tayernan di DJ kaminda ku un total di 6 hóben entre 13-15 aña ta tumando lèsnan di DJ. Den kolaborashon ku Jeugdhuis Jong Bonaire, Gang di Arte ta brinda 4 bia pa siman lèsnan di un ora na hóben nan di Jong Bonaire kaminda ku nan ta haña e chèns pa siña algu den arte. Banda di esei tres bes pa siman e hóben nan ku a inskribí pa Gang di Arte ta sigui seshon nan mas largu kaminda nan por bai mas profundo den e materia. E lèsnan di e programa prinsipal di Gang di Arte Bonaire ta habri pa hóben nan di Jong Bonaire tambe ku ke aselerá nan desaroyo komo DJ.
E DJ-nan enkargá ku e workshopnan aki ta Jaimy Abdul i Jerrysen Albertus tambe konosi komo Dj Orleus i DJ Panter/MC Jerr-Y. Tambe nan a haña un kurso intensivo serka DJ Laennon ku a bishitá nan for di Korsou pa yuda desaroyá mas. Den e seshon nan di DJ Laennon, nan a skohe nan number komo DJ i tambe pinta nan logo ku lo wòrdu tradusí den un logo digital. Pronto Boneiru ta bai sera konosí ku e DJ-nan mas hóben di Boneiru ku lo ta kla pa subi kaya pa entretené tantu grandi i chikí.
Gang di Arte Bonaire ta un proyekto ku ta kai bou di Art Culture Education Foundation ku e meta pa laga hóben nan eksplora, deskurbi i desaroyá nan mes den diferente forma di arte. Nan lo haña guia di profeshonalnan, oportunidatnan pa gana eksperensia riba esenario i tambe lo guia nan den nan trayekto pa bai studia arte den eksterior. E industria di arte i kultura ta algu ku no a haña hopi atenshion den su desaroyo pa hopi aña. Miéntras ku ta presis e sektor ei ta un di e motornan ekonómiko mas grandi na diferente pais. Banda di esei e tin un poder sosial enorme kaminda via di arte i kultura bo ta uni no solamente e komunidat di un pais sino tambe e tin e forsa pa krea lasonan estrecho entre diferente nashon. I e punto di salida pa esaki ta serka nos hóben nan ku mester haña e oportunidat pa desaroyá nan mes profeshonalmente.
Gang di Arte Bonaire ta hasi un yamada na tur hóben artista òf ku ke hasi algu artístiko pa tuma kontakto ku nos via di nos pagina di Facebook, ACE Bonaire òf na number di telefòn +599 790 0155.
BròKèS 93.5 ………… Skuch’é!
.png)
Comments