Dia 23 di Sèptèmber awor Gang di Arte ta bai tene su gran apertura ku e asina yama “Gang di Arte: Gang-up! Launch Event”. Esaki ta e promé aktividat di vários ku tin plania pa e promé aña di Gang di Arte Bonaire. Gang di Arte Bonaire ta uni ku diferente instansia ku ta ofresé desaroyo artístiko na hóben nan pa trese un show yen di variedat di talento. Lo bai tin presentashon di School of Performing Arts Bonaire, Casa de Musica Bonaire, ACE Tweens Club i mas. Banda di esaki e ganadónan di Gang di Arte Aruba lo ta di bishita na Boneiru pa hasi un presentashon e anochi aki. Nan ta bai trese un variedat di presentashon e anochi aki. Naturalmente e hóben nan DJ ku Gang di Arte ta preparando tambe lo hasi nan estreno e anochi aki.
Ku e evento aki Gang di Arte ke demostrá ku su vishon di union den arte ta algu faktibel i realisabel basta tur hende kere den dje. Pesei a skohe e nòmber “Gang-up” pa e evento aki. E palabra “Gang” i “Gang-up” hopi bia ta mara na kosnan negativo, pero un di e definishon nan den dikshonario Merriam-Webster ta spesifiká ku e ta nifiká “Uni pa un meta”. E meta ta pa trese union den mundu di arte i Gang di Arte lo bai demostrá esaki tambe e anochi aki. Banda di e presentashon ku e hóben nan lo prepará individualmente, nan tin komo tarea pa pasa un dia kompletu huntu pa krea un show pa presentá huntu.
Gang di Arte Bonaire ta hasi un yamada na pueblo di Boneiru pa bin duna nos hóben nan bo sosten i demostrá bo solidaridat den desaroyo di arte i kultura na Boneiru. Gang di Arte Bonaire: Gang-up! Launch event lo tuma lugá djasabra 23 di Sèptèmber 2023 di 7or pa 9or di anochi na Tera Cora Ranch. Karchinan ta disponibel na Lisa Convenience Store i Tera Cora Ranch. Tambe por yama òf app +599 790-0155 pa kumpra bo karchi.
BròKèS 93.5 ………… Skuch’é!
.png)
Comments