Fundashon Tienda pa Konsumidó a risibí keho tokante mal funshonamentu di ‘verlengsnoernan’ di orígen chines. Ta parse ku e verlengsnoernan aki ta kima mas lihé òf no ta adekuá pa tur aparatonan.
Tin keho i informashon a drenta tambe ku konsumidónan no ta haña nan sèn bèk na sierto supermerkado Chines ora ku bai hiba e produkto defekto bèk.
Preisnan abou di produktonan Chines por ta atraktivo, barata pero den e kaso aki no ta semper e mihó eskoho ora ta toka bo seguridat.
Riesgo di kenta di mas :
· Material Inferior: Verlengsnoernan di orígen chines ta barata pasombra mayoria biaha nan ta traha di material di ménos kalidat ku ta resultá den kentamentu eksesivo di e wayanan mas lihé.
· Uso Inkorekto: e kentamentu eksesivo por surgi tambe dor di no usa e produkto korektamente, por ehèmpel ora konektá aparatonan di mas riba dje, pega dos verlengsnoer na otro òf usa aparatonan ku ta eksigí un verlengsnoer mas fuerte.
· Señal peligroso: Tuma kuenta si e kabel ta manda kayente eksesivo durante uso òf si e verlengsnoer ta produsí holó di kimá. Esaki ta señal ku e no ta sigur pa sigui usa.
Rekomendashon;
· Seguridat Promé: Invertí den un verlengsnoer di kalidat di un fabrikante konfiabel. Evitá ku koriente ta dal bo òf kandela den kas
· Uso Korekto: Usa e verlengsnoer segun e spesifikashon i evitá di konektá aparato di mas òf pega mas ku un verlengsnoer na otro
· Kontrol: Kontrolá regularmente e estado di e verlengsnoer i remplas’é si bo nota señal ku e ta gastá òf e ta manda muchu kayente
Fundashon Tienda pa Konsumidó ta spera ku e informashon aki ta yudabo pa hasi eskoho mas sigur ora bo ta kumpra verlengsnoer. Pa mas pregunta òf informashon adishonal, por tuma kontakto ku Fundashon Tienda pa Konsumidó Boneriano
.png)
Comments