Fundashon Tienda pa Konsumidó Boneriano (FTPK)ta kontentu di anunsiá e lansamentu di e página Super-ganga riba nan website, un plataforma inovativo ku ta yuda konsumidónan haña produktonan ku preis atraktivo.
E inisiativa aki ta enserá ku e konsumidónan ta haña un alivio di gastu i ta stimulá empresanan lokal pa kompetí ku preisnan atraktivo. Empresanan ta haña e posibilidat pa publiká nan oferta riba e página di Super-ganga gratis, basta si nan kumpli ku sierto kondishonnan.
Na prinsipio e enfoke tabata solamente riba supermerkadonan ku tabata partisipá den komparashon di preis, pero awor FTPKB a skohe pa amplia e alkanse.
Asina ta permití partisipashon di empresanan no-alimentario tambe, basta si nan oferta ta kompetitivo i ta atraé konsumidónan.
E página Super Ganga riba e website di FTPK, ta komienso di un aventura ambisioso i FTPK ta kla pa krese! Aunke e oferta ainda ta limita na e momentonan aki, FTPK ta trahando pa amplia esaki pronto. E meta primordial di Super Ganga ta pa yuda konsumidónan spar sèn informando nan tokante e mihó ofertanan na Boneiru i pa animá empresanan pa presentá preisnan kompetitivo.
FTPK ta invitá konsumidónan pa bishitá regularmente e página di Super Ganga na https://tiendapakonsumido.com/en/super-ganga/ i keda na altura di e ofertanan mas aktual; Tene kuenta ku promoshonnan tin un fecha di ekspirashon. Huntu nos ta aspirá pa desaroyá Super Ganga komo un rekurso esensial pa kompra na bon preis.
Pa mas informashon òf pa entregá bo oferta komo negoshante, por tuma kontakto ku nos via tiendapakonsumido@gmail.com. Whatsapp 701-3569
.png)
Comments