Fundashon Alzheimer Bonaire: "Kon trata ku demensia segun e método di “Brein Omgeving”

Djabièrnè 24 di yüni último a tuma lugá un workshop den Sala Piet Mondriaan na Courtyard Marriott, di 9.00 or - 12.00 or. E workshop aki tabata organisá pa Zorg en Welzijn Groep i Fundashon Alzheimer Bonaire. E tópiko tabata “Kon trata ku demensia segun e método di “Brein Omgeving”. Orador tabata Sra Roxanne Brockotter i invitadonan tabata direktiva i personanan enkargá ku supervishon den institushonnan di kuido aki na Bonaire.

Partisipashon tabata fuera di tur espektativa ku un total di 42 partisipante, inkluso fisoterapeuta i médikonan. Tabata un presentashon masha eksitoso i interesante segun reakshon di e presentenan na final. Despues di pousa kolaboradornan di Zorg en Welzijn Groep a duna un presentashon tokante Pasadia i Respijtzorg i un boluntario / dunadó di kuido di Fundashon Alzheimer Bonaire a demonstrá ku algun ehèmpel kon por hasi bon uzo di e Qwiek up projector i di e MEM-beer, ámbos inovativo den Pasadia i Kasnan di Kuido na Bonaire.

Riba pòrtrèt por mira un parti di e partisipantenan, tur masha satisfecho i agradesido ku a ofresé nan e oportunidat pa por a partisipá na un workshop asina interesante, ku segun nan sigur lo kontribuí na kualidat di kuido na Bonaire.

===========================================

BròKèS 93.5 ………… Skuch’é!