Partido M21 ta boga pa sanshon mas severo komo posibel solushon pa frena uso eksesivo di alkohòl prinsipalmente den tráfiko aki na Boneiru.
Lider di e partido ta bisa; Daisy Coffie‘E di dos solushon ta ku por hasi e sanshonnan pa violashon di regla di tráfiko debí na mal uso di alkohòl mas severo.
Nos ta papia aki di entre otro but mas haltu, hala reibeweis aden i enkarselamentu di e violadó di regla. Mester bin tambe ku kontròl mas konsistente ku sanshonnan severo kontra benta di alkohòl na menornan di edat.
Un otro solushon ta pa hasi e seguro kontra tersera obligatorio pa asina en todo kaso esaki ta kubri e daño ku kousa na otronan. Tambe gobièrnu di Hulanda por konsiderá riba petishon di Entidat Públiko Boneiru pa oumentá e impuesto di akseins riba bebida alkohóliko di tal forma ku e preis di benta no ta atraktivo mas,’ segun Daisy Coffie.
Frakshon di M21 lo ke pa nos pone mas atenshon na e tema aki i lo sigui akumulá sifra pa loke ta trata konsumo di alkohòl na nos isla, pero tambe sifranan ku por indiká su efektonan negativo den tráfiko i su efektonan riba tereno sosial, pa por atendé ku e fenómeno aki na un manera rashonal.
Segun Konsehal Coffie: Meta di M21 ta pa promové un komunidat boneriano ku ta komportá su mes riba e área sumamente importante akí, pasobra no lubidá ku mal uso di alkohòl ta stimulá tambe krímen den nos komunidat. I si tin un pida importantísimo di nos produkto turístiko ku nos mester ta orguyoso di dje ta e porsentahe abou di krímen na nos isla. Ta na nos pa mantené i konservá esaki asina.
.png)
Comments