Frakshon di M21 - Bienestar di Bestia

Den e Ordenansa Insular di 25 di yüni 1998, nr. 2, remplasando e Ordenansa di Kachó (A.B. 1961, nr. 14, artíkulo 3 insiso 1 i 2, tin pará:

Insiso 1: Ta prohibí pa doñonan di kachó laga esakinan sin supervishon riba kaminda públiko òf riba un tereno ku ta aksesibel pa tur hende.

Insiso 2: Kachó ku ta sin supervishon riba kaminda públiko òf riba un tereno ku ta aksesibel pa tur hende, òf riba un tereno ku un persona ku derecho pa hasi esaki a pone aksesibel, ta keda kapturá pa polis òf pa personanan ku Kolegio Ehekutivo a indiká pa hasi esaki.

Den artíkulo 12 insiso 2 di e mesun ordenansa tin pará: Esun ku violá loke tin stipulá den artíkulo 3, 8 i 9 di e ordenansa akí, ta keda kastigá ku detenshon di maksimalmente 2 luna òf un but di maksimalmente 5000 florin ($ 2793.30).

For di artíkulo 1 nos por dedusí ku un hende ku saka su kachó un ratu pafó di kurá sin supervishon pa hasi su nesesidat, ta kastigabel. Tambe nos tin e kachónan ku ta skapa for di kura i kachónan supuestamente “sin doño” k u ta terorisá kunukunan i mata bestia di kunukeronan. Lamentablemente NO tin mantenshon di e lei akí. Si for di aña 1998 a mantené e lei akí korektamente, e ora ei lo tabatin ménos embaraso indeseá serka kachó i sigur ménos òf ningun insidente real di mordementu. I tambe ménos problema ku kachónan ku ta mata kabritu. Ta trata pues di un problema ku gobièrnu mes a krea i tene na bida pa motibu di su aktitut negligente di no sòru pa mantenshon di e lei durante tur e añanan akí. Ora ku tin molèster, por sierto ta hopi mas fásil pa pone e kachónan drumi òf pa tira nan mata, pasobra e ora ei mesora a ‘solushoná’ e problema.

Den Artíkulo 477 di Kódigo Penal BES tin pará:

Ta kastigá ku un detenshon di maksimalmente un luna òf un but di promé kategoria:

Insiso 1: E persona ku sin ku ta nesesario ta kousa doló òf herida na un bestia, ku sin ku ta nesesario ta torturá un bestia òf ku sin ku ta nesesario ta hasi daño na salú di un bestia.

Insiso 2: E persona ku sin ku ta nesesario, ta keda sin duna e kuido nesesario na un bestia ku kompletamente òf parsialmente ta pertenesé na dje i ta bou di su supervishon, i ku e ta obligá di duna kuido.

Den e situashon eksistente na Boneiru ta asina, ku ora un kachó sin ku ta nesesario ta keda sin haña kuminda i ta desnutrí, den mayoria kaso ta konfiská e kachó akí. Sinembargo no ta kastigá e persona ku a kousa esaki na e bestia i hopi biaha dentro di korto tempu e tin un otro kachó atrobe.

Na aña 2016 tabatin vários reunion ku Entidat Públiko Boneiru pa motibu ku diferente organisashon di bestia a tende ku tabata pone kachó drumi, sin ku e doñonan tabata na altura di esaki. Sinembargo, despues di un aña i mei a saka stèker for di e konsultanan akí. E gezaghèber di e tempu ei, a laga parse ku e organisashonnan di bestia no por a traha huntu i ku pa e motibu akí no tabatin sentido pa sigui. E bèrdat tabata, ku Entidat Públiko Boneiru no por a hasi loke e tabata ke, esta di saka un komunikado di prensa tokante tur loke a logra. Sinembargo nada no a keda lográ. Kada biaha Entidat Públiko Boneiru tabata kambia di opinion i nan no tabata kumpli ku nan promesanan tampoko.

Te ku e dia djawe e organisashonnan di bestia ta traha korektamente huntu. Pa motibu ku durante e último añanan kada biaha tabata drenta mas keho, na fin di luna di mart 2022 Entidat Públiko Boneiru a lanta un asina yamá ‘Grupo di Trabou di Kachó’. E grupo di trabou akí lo a duna konseho tokante kon lo mester a solushoná e problemanan ku molèster. Te na e momentu akí, un aña i mei despues di a lanta e grupo di trabou akí, te ainda no a hasi nèt nèt nada. Segun e grupo di trabou a hasi investigashon profundo relashoná ku kon e problemanan ta surgi i a konstatá ku e problema tabata kompleho. Remarkabel ta ku despues di un súplika pa haña e nótulonan òf pa mira e rapòrt tokante e konklushonnan, e grupo di trabou no por a mustra nada.

Esaki mester ta bon kla: si un aña i mei pasá nan a kuminsá ku un kampaña klarito via medionan sosial, radio, televishon, foyeto pa parti kas pa kas etc., e ora ei lo tabatin visibelmente ménos problema. Probablemente e grupo di trabou akí ta konsiderá e problema komo kompleho, pa motibu ku tin ku mantené e lei, pero ku e instansianan konserní no por tuma desishon tokante ken tin ku bai hasi esaki.

E problema di kachó (molèster di kachó ku ta kana lòs, insidente ku mordementu i similar) ta birando kada dia mas grandi, awor ku tur lugá di akohida ta yen yen. E proverbio ‘mòp ku kranchi habrí’ ta aplikabel akí: e organisashonnan ta pasa mòp, pero gobièrnu ku tin ku sera e kranchi ta wak den otro direkshon i ta laga awa sigui basha.

Hasiendo uso di artíkulo 45 di reglamentu di òrdu i Konseho Insular, frakshon di M21 ta deseá di haña kontesta oral di parti di Kolegio Ehekutivo riba e siguiente preguntanan den e siguiente reunion públiko di Konseho Insular.

1. Dikon e investigashon di e ‘Grupo di Trabou di Kachó’ no ta públiko?

2. Raad por haña un kopia di e investigashon i su resultadonan?

3. Dikon no ta posibel pa tira bista den e investigashon di e ‘Grupo di Trabou di Kachó?

4. Raad por haña akseso pa tira un bista den e investigashon i su resultadonan?

5. Dikon na fin di luna di mart 2022 no a kuminsá mesora ku e kampaña ku a primintí relashoná ku tenementu di kachó riba propio tereno?

6. Dikon durante tur e añanan despues di 10-10-10 no a kuminsá ku adaptashon di legislashon relashoná ku bienestar di bestia? Hopi biaha kaba a konfrontá e koalishon aktual ku esaki, den otro koalishonnan tambe.

7. Dikon no ta instituí un asina yamá ‘polis di bestia’, di manera ku por tuma akshon inmediatamente?

8. Dikon Kuerpo Polisial Hulanda Karibense no tin medio pa kapturá kachó i dikon nan no ta disponé di konosementu adekuá relashoná ku komportashon di bestia?

9. Dikon Entidat Públiko Boneiru no ta sòru pa lugá èkstra pa akohida, ku lo ta nesesario ora ku kuminsá mantené lei den un forma korekto?

10. Dikon no ta investigá eventual insidentenan di mordementu, pero ta sali mesora for di e punto di bista ku ta e kachó ta e malechor?

BròKèS 93.5 ………… Skuch’é!