Formashon di Aspirante di Duana ta Den Ful Suin

E aspirantenan di Duana/CN ta den ful suin ku nan formashon pa bira duanero.

E dies aspirantenan ta sigui e ‘Taakgerichte C-opleiding’ ku ta konsistí di tres parti prinsipal: e módulo Agente ekstraordinario di polis BAVPOL), e módulo Téknika profeshonal básiko di funshonario-C di Duana i e módulo Traha di manera dirigí riba tarea di e formashon a kuminsá den òktober 2023 i ta dura un periodo di nuebe luna, unda a tene kuenta tambe ku periodo di vakashon i dia liber di skol.

Durante di e formashon e aspirante ta haña diferente materia manera:

-Agente ekstraordinario di polis (BAVPOL): Derecho penal i prosedimentu penal, aktitut i kòntròl propio, prosèsferbal i aktuashon;

-Formashon profeshonal Integrá (IBT): téknika pa manehá violensia;

-Detenshon i defensa propio (AZV): ‘wapenstok’, bui i ‘pepperspray’;

-Estudio di Arma i abilidat pa tira;

-Lei di Duana i Impuesto BES (DABES): Tarifa, ‘Douanewaarde’,

‘Vrijstellingen’, Outorisashon Ofisial, ekipahe di biahero, Impuesto;

-Seguridat, Salubridat, Ekonomia i Medioambiente (VGEM) leinan espesial:

Lei di Arma, Lei di Arma di kandela, Lei di Remedi, Lei di medio líkido, CITES/ Lei di fundamentu i protekshon di naturalesa BES, lei di Opio 1960 BES, Lei Veterinario i di produkto básiko. Sobra materia manera hulandes i Asycuda World (esaki ta e sistema ku Duana ta uza pa registrá tur medio ku e ta uza).

Momentu ku e aspirante finalisá e tres módulonan ku éksito, ta nombr’é komo duanero. Ta otorg’é sertifikado pa eksámen di materia pa nombramentu komo funshonario C di Duana. E ora ei ta empeñá e duanero ku a kaba su estudio pa Hulanda Karibense.

Ta ubiká e duaneronan nobo entre Saba, Sint Eustatius i Boneiru.