Entrante 1 di november 2022 a redusí tarifa di koriente di WEB ku sosten di medionan lokal di Gobiernu di Boneiru. A baha e tarifa fiho pa tur hende na $0 i riba e tarifa variabel a apliká un tarifa di 3,5 sèn di dòler pa KwH. Ku esaki a redusí e tarifa variabel na e suma será di $0,39 pa KwH. E rebaho riba e tarifa fiho i redukshon di e tarifa variabel ta aplikabel tantu pa kas di famia komo pa empresa. Pa Pagabon tambe e mesun tarifa variabel redusí ta na vigor.
En total Gobiernu di Boneiru a hasi un suma di mas òf ménos 5 mion dòler liber pa sosten pa e tarifanan di koriente. Di esaki un suma di mas òf ménos 2,5 mion dòler ta bini for di entrada di impuesto di turista. E sobrá 2,5 mion dòler ta en espera ainda di un desishon di Konseho Insular.
For di 1 di yanüari 2023 tin sosten for di Ministerio di Asuntunan Ekonómiko (EZK) loke ta kondusí na un tarifa fiho redusí di $0 i un tarifa variabel redusí di $0,407. Ku esaki e tarifa variabel ta subi un tiki, pero danki na e sosten akí e tarifa ta supstansialmente mas abou ku e tarifa real di $0,434. Pa e periodo akí for di 1 di yanüari 2023, aktualmente tin konsulta ta tuma lugá tokante kon por yena e sosten for di Entidat Públiko Boneiru mas aleu, komo komplementashon riba sosten di Ministerio di Asuntunan Ekonómiko. Esaki tabata en espera ainda di e tarifanan nobo entrante 1 di yanüari 2023, ku resientemente nan a anunsiá.
Diputado Hennyson Thielman ta enfatisá ku e sosten akí ta un di e medidanan ku kua ta kontribuí na mantené bida diario na Boneiru pagabel. Ta finansiá e medidanan akí for di entrada di impuesto di turista.
===========================================
BròKèS 93.5 ………… Skuch’é!
https://www.radio935bonaire.com
http://radio.garden/listen/bro-ke-s-93-5-fm-boneiru/a1YG6S77
https://www.basilachill.com/#!radio/radiobrokes
.png)
