Entidat Públiko Boneiru mester mantené lei relashoná ku problema di kachó

Norbert Tadema kandidato riba lista di M21:

Den reunion di Konseho Insular di 12 di sèptèmber 2023 frakshon di M21 a hasi pregunta na Kolegio Ehekutivo tokante e problemátika di kachó. Na luna di mart 2022 Entidat Públiko Boneiru a lanta un grupo di trabou ku a haña komo tarea pa identifiká e problemátika i atendé ku esaki. A base di e kontestanan ku e grupo di trabou akí a duna riba e preguntanan di frakshon di M21, lamentablemente nos tin ku konstatá ku den ningun forma nan no ta tuma e problema di kachó na serio. E ‘grupo di trabou di kachó’ manera nan ta yama nan mes, ta laga parse ku durante e un aña i mei despues ku nan a lanta, nan a hasi investigashon profundo. For di nan kontestanan ta resultá sinembargo ku nan no a hasi investigashon, pero ku nan ta referí na un investigashon ku Wolfs Compagnie a hasi na luna di yüli 2021. Ku otro palabra: un investigashon ku a tuma lugá algun aña pasá kaba, asta promé ku a lanta e ‘grupo di trabou di kachó’ i ku no ta basá eksplisitamente riba e situashon aktual na Boneiru. Tambe e ‘grupo di trabou di kachó’ ta keda ripití kada bes di nobo ku e problema ta kompleho i ku pa e motibu akí tin mester di tempu pa yega na un bon plan. Sinembargo e grupo di trabou no ta realisá su mes ku e problema di kachó a surgi debí na neglisensia pa loke ta trata mantenshon di lei i dunamentu di direkshon di parti di Entidat Públiko Boneiru. Konsekuensia di e neglisensia akí ta un kresementu eksplosivo di e kantidat di kachó ku e problemanan ku esaki ta trese kuné na Boneiru.

Sigui ehèmpel di Aruba

E preguntanan tokante e echo ku Kuerpo Polisial Hulanda Karibense (KPCN) no ta disponé di instrumento pa kapturá kachó ni konosementu adekuá relashoná ku komportashon di kachó, tambe nan a pone fásilmente un banda ku kontestanan ku no ta bisa nada. Riba e pregunta dikon na KPCN nan no ta kuminsá ku un departamento spesial, esta un asina yamá ‘polis di bestia’, nan no ta duna un kontesta konkreto. Aktualmente na Aruba nan ta hasiendo uso di un maneho bon kla pa atendé ku e problema di kachó. Un ‘Unidat di kachó K9’ huntu ku polis di bario den un forma hopi severo ta bai supervisá mantenshon di lei, kaminda kachó, meskos ku na Boneiru, no tin mag di ta visibelmente riba tereno públiko sin vigilansia. Algu mas ku dos luna pasá polis na Aruba a anunsiá ku nan ta bai mantené lei di kachó. Na Aruba tambe lamentablemente nan tabata neglishá mantenshon di lei, di manera ku meskos ku na Boneiru, molèster di kachó a bira muchu grandi i tabata nesesario pa tuma akshon. E ‘Unidat di kachó K9’ akí ta kontrolá maltrato i deskuido di kachó. Si konstatá esaki, nan ta duna but haltu i nan por konfiská e kachó. Den ningun artíkulo relashoná ku e problemátika di kachó na Aruba, nan no ta usa e palabra ‘KOMPLEHO’, loke e ‘grupo di trabou di kachó’ na Boneiru konstantemente sí ta hasi. E grupo di trabou ta usa esaki komo argumento pakiko durante un aña i mei nan no a hasi nada.

Tempu pa akshon

Mester ta bon kla ku Boneiru ta disponé di legislashon for di aña 1998 ku mester mantené. Awendia por apliká e legislashon akí inmediatamente i tin mag di duna but ora ku no kumpli ku esaki. Pa loke ta trata deskuido i maltrato di kachó (i di bestia en general) tambe tin legislashon klarito, esta artíkulo 477 di Kódigo Penal BES. Akí den tin pará ku por duna but pa deskuido i maltrato tambe i ku asta por imponé kastigu di prison. Pa e motibu akí nos konseho na Entidat Públiko Boneiru i e ‘grupo di trabou di kachó’ ta: wak nos isla ruman Aruba i kuminsá mas pronto posibel ku un bon kampaña riba eskala grandi via medionan sosial, radio, korant, televishon, poster etc., di manera ku tur doño di kachó ta na altura i ku despues di algun luna por aktua severamente ku but ora no kumpli ku lei. Durante e lunanan di e kampaña akí lo tin ku duna atvertensia sí den kaso di violashon di e lei i no aktua mesora fuertemente. Sòru pa doñonan di kachó tin sufisiente tempu pa nan mes tuma medida. Esaki teniendo kuenta ku ya pa 25 aña kaba a keda sin mantené e lei. M21 ta para pa un Boneiru ku kariño pa bestia i pa e motibu akí ta urgi pa awor sí tuma akshon porfin. Entretantu nos ta keda vigilá.

BròKèS 93.5 ………… Skuch’é!