E título di kampion di PSV den e Divishon di Honor na Hulanda no a eksaltá Hulanda solamente, sino Boneiru tambe. For di 2022 Boneiru ta partner di e prominente klup di futbòl PSV, anto e viktoria resien a trese kuné bentahanan konsiderabel pa Boneiru.
Komo partner di PSV ta proyektá e logo di Boneiru prominentemente den Stadion Philips, ku e resultado di un eksposishon mas grandi pa e isla. E triunfo resien di PSV a oumentá e sifranan di mirónes ku garantia, loke tambe ta ampliá e posibilidatnan di eksposishon mas aya di Boneiru durante otro weganan di PSV, entre nan den e Liga di UEFA Champions.
E kolaborashon entre Boneiru ku PSV ta algu ku na 2022 e eks diputadonan Hennyson Thielman i James Kroon a regla. Na Eindhoven a seya e akuerdo pa ámbos partido ku originalmente a firma pa dos aña, na luna di yüni 2022.
Ya kaba e frutanan di e akuerdo akí a bira visibel, entre nan dos kampamentu di entrenamentu organisá pa PSV na Boneiru, ku partisipashon di mas ku sentenáres di hóben a partisipá.
Alabes a organisá un mishon empresarial na Boneiru ku partisipashon di diferente empresa partner di PSV ku a biaha pa Boneiru pa tuma parti na esaki na Boneiru.
Loke ta parti di e akuerdo tambe ta ku PSV lo mester bin ku su ekipo i hunga kontra un ekipo di Boneiru den un wega amistoso.
E dos anterior mandatarionan James Kroon i Hennyson Thielman ta manda felisitashon kaloroso pa PSV ku nan título di kampion i ta mira ku entusiasmo pa futuro kolaborashon fruktífero entre e dos partidonan.
BròKèS 93.5 ………… Skuch’é!
.png)
Comments