Entrante 23 di yüli 2024 Edsel Winklaar nombrá komo direktor nobo di Selibon N.V., esaki riba un base interino. Edsel Winklaar ta susesor di Rudsel Leito ku durante e último diesdos aña tabata direktor di Selibon N.V. Despues di hopi aña di dedikashon di Leito a yega e momentu pa traspasá e liderazgo. Su susesor ta un direktor ekpserensiá riba tereno di kompanianan di gobièrnu di Boneiru i e tin konosementu di atministrashon públiko i di nos komunidat boneriano.
Edsel Winklaar tin entre otro mas di 30 aña di eksperensia den organisashonnan ‘profit’ i ‘non profit’, i e tabata enbolbí ku konseho stratégiko riba proyektonan grandi, análisis di organisashon i maneho di kambio. Den pasado el a traha entre otro komo hefe di departamento di realisashon na Direktorado di Planifikashon i Desaroyo, komo mènedjer di e unidat komersial di WEB N.V. i komo direktor general di Telbo N.V. Banda di esaki el a desempeñá funshonnan tambe komo diputado i miembro di Konseho Insular di Boneiru.
Segun Hunta di Komisario di Selibon N.V, den sr. Winklaar nan ta mira un aktitut ku enfoke riba resultado, pero prinsipalmente ku enfoke riba hende i ku kaminda ta nesesario sa kon pa traha brùg. Nos ta pensa ku e por duna un aporte na solushon di e hopi desafionan ku Selibon N.V. ta konfrontá. E ta un estratega ku konosementu i forsa di ehekushon ku den un forma eksitoso por duna guia na kambio. Tur esaki ku e meta pa mantené Boneiru limpi i habitabel, i pa duna un aporte positivo na konservashon di nos medio ambiente i naturalesa.
.png)
Σχόλια