Djasabra anochi un públiko grandi a bin Plaza Resort pa skucha storia kòrtiku.
Mas ku shen hende tabata presente, e sala di Plaza Resort tabata yen yen. Sinku persona a skirbi un òf mas storia. Na total tabata tin 8 storia. No ta tur skirbidó a konta e storia ku nan a skirbi. Sea pa motibu di ta afó di e isla òf pasobra a preferá laga otro hende konta pa nan.
Akademia Papiamentu a kontratá Segni Bernadina di ACE Foundation pa organisá un kurso pa siña skirbi storia kua a kulminá den un festival unda a konta e storianan skirbí na públiko.
E meta di e aktividat tabata pa krea mas skirbidó na papiamentu. E úniko rekisito tabata ku e storia mester ta basá riba dicho i proverbio.
E skirbidónan tabata: Rocio Chavez Mezza, Shahaira Valerio, Beatrix Boekhoudt, Xiomara Blanca i Paulina Rodriguez.
Ku e kantidat di hende ku a presensiá, e aplouso risibí i e harimentu nos por konkluí ku e públiko a gusta loke nan a tende i por bisa ku e festival tabata un éksito rotudo.
E festival akí lo bira un anual. Pa 2024 lo tene e promé tayer pa siña skirbi storia kòrtiku den e promé siman di mart. Dos siman promé lo kuminsá hasi promoshon. “LIKE” e página di “Facebook” di Fundashon Akademia Papiamentu i e página di “Youtube” pa bo keda informá di e aktividatnan.
BròKèS 93.5 ………… Skuch’é!
.png)
Comments