E promé festival anual di Yoga & Wellness na Boneiru

Nos isla lo organisá e promé edishon di e siman di Yoga & Wellness di Boneiru den kolaborashon ku partnernan den e sektor

Tourism Corporation Bonaire (TCB) a anunsiá ku for di 19 te 25 di yüni nos isla ta organisá su promé Siman di Yoga & Welness anual den kolaborashon ku Bindu Yoga & Healing Centre.

E festival ku ta dura un siman, lo konsistí di yoga retreat, wellness i pakete di rehubenesimentu pa yuda nos wéspetnan mehorá nan eksperensia spiritual kompleto. E maestro i influensiadó mundialmente konosí Laruga Glaser ta tene e Ashtanga Yoga Retreat i lo enfoká riba e karakterístikanan spesífiko di e seri di Ashtanga Primary. Durante e retreat akí Laruga lo yuda e praktikantenan di yoga pa bai mas profundo den e fundamentonan di práktika di Ashtanga yoga i den filosofia di yoga.

E Gentle Healing Yoga Retreat den kolaborashon ku Flowmingo Studio ta enfoká riba chakra (sentro di energia) pa eliminá blokeo emoshonal den nos kurpa. Durante e lèsnan i tayernan e partisipantenan lo hasi uso di diferente forma di sanashon pa komprendé nan mes mas mihó i pa fortifiká e konekshon ku nan kurpa i mente.

E paketenan di wellness i rehubenesimentu ku ta disponibel ta ofresé nos wéspetnan eksperensia di hipoterapia i forma di ekilibrá nan chakranan di nobo te ritual di embeyesimentu i masashi ku piedra presioso. Sea ku nos wéspetnan ke sana e mucha den nan mes, òf nan ke hasi konekshon di nobo ku nan sentido pa aventura, òf nan ke ekilibrá nan mente, kurpa i alma, e partnernan di wellness na nos isla a krea un variedat di eksperensia transformatorio pa kumpli ku nesesidat di kada hende.

‘Nos ta kontentu ku durante e verano akí nos ta organisá nos promé festival anual di Yoga & Wellness i laga nos bishitantenan sera konosí ku e mihó eksperensia di wellness’, segun Miles Mercera, direktor di TCB. ‘E naturalesa bírgen di Boneiru, kombiná ku nos esfuersonan pa enkurashá biahamentu sostenibel ku un enfoke riba hasi konekshon di nobo, no solamente ku tera, pero tambe ku nos mes, a hunga un ròl importante na momentu di organisá e evento akí. Intenshon di e siman di wellness ta pa trese praktikantenan di yoga i hendenan ku djis ke mehorá nan eksperensia spiritual huntu, i na mes momentu ofresé oportunidatnan úniko pa rehubenesimentu i iluminashon.’

Pa hasi e eksperensia di wellness akí kompleto, riba djadumingu 25 di yüni nos isla ta organisá un Festival di Yoga na Te Amo Beach, kaminda bishitantenan por disfrutá henter dia di diferente lès, tayer, charla i eksperensia aklarador dibertido i edukativo. Lo tin tambe vários foodtruck i stènt ku alimento salú i konsiente, un merkado di ‘lifestyle’ eksótiko i ‘dance beats’ ekstátiko pa selebrá iluminashon spiritual riba bich.

===========================================

BròKèS 93.5 ………… Skuch’é!